TURA: Dingtang dingtang biaprangoni Tura-ona re·bae poraienggipa chatro chatrirangko, line bus-rango gatjaengani a·sel dingtang dingtang songrangoni re·rurae poraienggipa chatro chatrirang neng·nikanirangko chagrongna nangtokenga ine Federation of Khasi Jaintia & Garo People (FKJGP) Garo Hills Zone parakatenba, iani bidingo West Garo Hills a·jani Deputy Commissioner-na badi ka·e sedoataha.
FKJGP-GHZ-ni parakatani gitade, Tura jillara Garo Hills-o lekka porako on·anio mongsonggipa biap ong·ani gimin Tura jillani samba jolrango donggipa songni nokni bang·bata manderangan, detangtangko Tura-o poraina gita watattokenga aro gipin biaprangoni Tura-ona re·bae poraienggipa pilakande Tura jillao nok pararangko ra·e ba hostel-rango donge poraipana chol ong·jani gimin mitam chatro chatrirangde songtang noktangoni salantian re·rurae poraitokengachim.
Indake ong·engon, Tura jillaona re·ruraenggipa bus garirang, chatro chatrirangko gatna jechaktokengani a·sel, re·rurae poraienggipa mitam chatro chatrirangde, kilometre 30-mang ong·gipa ramarangko skul jokeba ja·achi re·angpilna nangtokenga ine FKJGP-GHZ-ni dilgiparang parakataha.
“Ia bus gariko chalaienggipa manderang, chatro chatrirangoniko chu·gimik parako man·jawa ine ma·siesa chatro chatrirangko gatna jechaktokenga ine chinga chanchichipenga. Tura-oni Mukdangra jolrangona sal napani ja·man ja·achi re·aniara, chatro chatrirangna aro mongsongbate chatrirangna namen kenchakna nanganiba ong·enga,” ine FKJGP-GHZ-ni dilgiparang parakatenba, iani bidingo dingtangmancha bus garirangko chalaienggiparangna ge·etaniko ba niamko donatchina gita West Garo Hills a·jani Deputy Commissioner-ko didiataha.
