FOCUS Plus-ni ning·o game ge·e cha·giparangna on·enggipa tangkara loan-ni tangka ong·ja: CM

TURA: Meghalaya sorkarini a·bachengatgipa Farmers Collectivisation for Upscaling Production & Marketing System Plus (FOCUS+)-ni ning·o a·doko game ge·e cha·enggipa nokdang ge·antina sorkarini on·enggipa gong 5000 tangkarangara, loan ba sudna on·enggipa tangka paisarang ong·ja indiba ian gama ge·ani aro gipin kam ka·e cha·aniko a·bachengatna on·enggipa tangkarangsa ong·a ine Bristibar salo, a·dokni Chief Minister Conrad K Sangma parakataha.
FOCUS program-ni chu·sokgipa ong·aniko manina gita Bristibar salo, South West Garo Hills a·jani Betasing block-o jinma tom·bimonganiko ong·atanio a·dokni Chief Minister Conrad K Sangma, ia kattarangko aganangaha.
Ia tom·anio a·dokni Chief Minister, Williamnagar-ni MLA Marcuise Marak, North Tura-ni MLA Thomas A Sangma aro dingtang dingtang MDC-rang baksa, Betasing jolo donggipa dol 40 producer group-rangna, gimik gong lak 22.95-ni cheque-rangkoba suale on·angjolaha.
FOCUS program-ni chu·sokgipa ong·ani gimin talataniko on·angengon, batanggimin bilsibrini gisepo FOCUS program-ko man·chape, dingtang dingtang scheme-ni ning·o gong kror 1500-na baten tangka paisarangko, a·doko game ge·e cha·enggiparangna suale on·na man·aha ine Chief Minister parakataha.
“FOCUS program-ara lak 4.5 game ge·e cha·enggipa manderangni namgnina ra·gatgipa program ong·a aro ia program-ni chu·sokgipa ong·aniko nike ia sorkari, a·doko game ge·e cha·enggipa nokdang ge·antinan gong 5000 tangkarangko on·dapna gita FOCUS+ program-koba a·bachengataha,” ine Chief Minister aganaha.
Chief Minister-ni parakatani gitade, ia FOCUS program-ni ning·o a·dok gimiko dol 18,000-mangni gita producer group-rangko bikotaha aro da·oba iandakgipa dolrangko bikotengkua.
Bilsiantian game ge·e cha·enggipa manderangna North East Food Show aro uandakgipa program-rangko ong·ate sorkari, game ge·e cha·enggipa aro bading chiwale cha·enggipa manderangni janggi tangani gadangko tang·doatna man·enga ineba ia tom·anio Chief Minister parakataha.