Shillong: Department of Arts and Culture, Government of Meghalaya aro Indian Council For Cultural Relations (ICCR) apsan nangrime mijal salni bako, U Soso Tham Auditorium, Shillong-o, ”Har Ghar Tiranga” ine bimingko done programme-ko ong·atangaha. Programme-ko ong·ataniona, Education Minister, Shri Lahkmen Rymbui, Chief Guest aro Chief Secretary, Shri D P Wahlang, Guest of Honour ong·e re·baaha.
Programme-ko ong·atanio, Shri Lahkmen Rymbui, India a·songo donggipa manderangna ian mangsonggipa sal ong·a, maina an·chingni a·songni nisanni gamchataniko, India a·songni jakgitel ong·aoni bilsi 75 gapaniko manie mesokna gitasienga. Unbaksana an·ching ia bilsini gisepon, Meghalaya a·dokni bilsi 50 gapaniko maniangaha aro manderangni ka·tongo, a·songni nisanna ka·saaniko aro ka·oksianiko anga da·al salni bako nikna gita man·enga, ine aganangaha. A·dokni dingtang dingtang bakrango iako maniani gimin aganengon ua indake agananaha, an·chingni nisanko namen niksengenga aro dingtang dingtang nokrango mikkim rasong gnang donganiko nika baksana, garirangoba nisanko pote chalaitokenga ian namgipa gunko mesoka. Indake, dingtang dingtang, SHG-rangni nisanrangko bimchipe tarie on·ahaninaba, Shri Rymbui mittele aganangaha.
Indake, kosako janapgimin kattarangko aganani ja·mano minister, a·songni nisanni mikkim rasong donganiko manderangna gisik ra·atna gita cholrangko on·ahaniba, Prime Minister Narendra Modi-ko mittele aganangaha. Nokrango nisanko songana agreba, an·chingni ka·tongoba nisanko dona nanga, ine ua aganangkuaha.
Batanggimin bilsirangode, mangsonggipa tom·anirangosan an·ching a·songni nisanko songdorongaiachim, indiba da·ode an·ching India a·songni mande ong·e, a·songni gamrang, nisan aro rasongko pangnan name rakkina nangani gimin masiaha. Ian an·chingni salantio dakna nanggipa kamrang ong·a baksana a·songko mande ra·aniba ong·a, maina a·songo dingtang dingtang jatrang donggenchimoba, an·ching a·song jagitele dongna gita man·enga, ine ua aganangaha. A·songni nisanni rong geanti aro dingtang dingtang bakrangon dingtang dingtang miksonganirang donga, uni gimin nisanni gunrang gita, poraigipa chatro chatrirang janggi tangna gita nanga, ine ua aganangaha.
India a·songo donggipa manderang ong·e, an·ching rasong chana gita nanga aro rasong chae, nisanko songdona gita nanga, ine ua aganangkuaha. Unbaksana, a·songni donggipa dingtang dingtang manderangni iako maniana, ua nama skaniko on·anga baksana, an·chingni janggi tanganio ia nisanrangni miksonga gita ong·china, ine agananiko matchotataha.
Shir D P Wahlang-ba tom·aniona re·bagipa manderangna indake aganangaha, ia programme-ko, India a·songni bilsi 75 jagitelaniko manina gita, Azadi ka Amrit Mahotsav ong·atenga. Har Ghar Tiranga programme, August 13-oni 15 tarikona ong·anggen, aro ian bilsi 75 ong·aniko manianio, India-ni nisan aro songdongenggipa manderangko nangrimatna gita miksongani ong·a baksana, a·songni nisanni gimin manderangna talbate u·iataniko dakna miksonganiba ong·a, ine ua aganangaha. A·songni nisano donggipa minggittam rongrangni miksongani gimin, Ashoka Chakra aro ge 24 spoke-rangni giminba ua manderangna talate on·angaha.
Indake, programme-ko ong·atanio jolo donggipa dingtang dingtang skulni chatro chatrirang bakko ra·anga baksana, gitko ringgipa dol aro a·doko bilsini gita dal·batgipa manderangba bakko ra·angaha.
Arts & Culture-ni, Commissioner Shri F R Kharkongor, Shri C V D Diengdoh, Secretary Home, Smti I Laloo, Deputy Commissioner East Khasi Hills, Shri K L Nongbri, State Nodal Officer Har Ghar Tiranga, Shri M Sangma, Director DIPR aro gipin offcial-rangba. programme-o bakko ra·angaha.
