SHILLONG: Meghalaya a·doko Inner Line Permit (ILP)-ko ra·gatchina aro Constitution-ni Eighth Schedule-o Khasi aro Garo ku·sikrangkoba ra·napchina dabianirangko ma·mong sorkari chu·sokatchipkujaengani gimin dingtang dingtang dolrang ma·mong sorkarini kamo suk ong·gijaniko paraktokengon, a·doko ILP-ko ra·gatani bidingo aro a·dokni Khasi aro Garo ku·sikrangko Eighth Schedule-o chapatani gimin ua ma·mong sorkari baksa agangrikgen ine Sonibar salo Jal Shakti aro Tribal Affairs-ni Union Minister of State (MoS) Bishweswar Tudu ku·rachakaniko on·angaha.
“Bang·a minister-rangan salgro salaram a·dokrangona re·bae, salgro salaram a·dokrango nangenggipa kamrangni gimin ma·mong sorkarina report-ko on·erongenga. Meghalaya a·doko ILP-ko ra·gatchina nangniktokengani gimin aro Constitution-ni Eighth Schedule-o Khasi aro Garo ku·sikrangkoba chapatchina nangniktokengani gimin angaba an·tangni report-ko ma·mong sorkarina on·e, iarangko maikai ra·gatna man·gen, uani bidingo sorkari baksa agangrikgen,” ine Tudu parakataha.
Iarangni bidingo ua BJP-ni dilgiparang baksa agangrike, ma·mong sorkarina ku·pattianiko on·anggen ineba Union Minister of State parakataha.
A·songni dingtang dingtang biaprango donggipa manderang pilakan dingtang dingtang nanganirangko dabitokenga indiba ia dabianirangko chu·sokatna dongimin niamrang donga ine janapatengon, ia kamrangni bidingo nangchongmotgipa report-ko man·jaskalde ma·mong sorkariba mamingkon dakna man·ja ine Tudu aganaha.
Indake ong·engon, a·doko dilgiparangko matnange dongaigija, tangka paisa jakkalsretani aro ong·gija dakgipa kamrangni kosako ku·cholsan ong·e ku·rangko on·china gitaba Union Minister of State, a·dokni manderangko didiangaha.
“A·doko maiba ong·gija kamrangko nikna man·engon, ua kamrangko dilgiparangsan matnange dongaiode aro manderang pilakan mamingkoba dakjagenchimode mamingkoba namatna man·jawa. Uni gimin manderang an·tangtangan iandake tangka paisa jakkalsretanirangko ma·sie ja·kuko de·na nanggen,” ine Tudu aganaha.