SHILLONG: Meghalaya Legislative Assembly-ni Autumn Session-ko re·baenggipa September 9 tarikoni ong·atanggen.
Budbar salo, Business Advisory Committee (BAC)-ni tom·a matchotani ja·man kobor ra·timgiparangna u·iatengon, Assembly-ni Autumn Session-ko September 9 tarikoni 16 tarikona ong·atanggen ine Assembly-ni Speaker Metbah Lyngdoh parakataha.
Assembly Speaker-ni parakatani gitade, ia Autumn Session-o saldok kam ka·ani salrang donggen, jeonin government business-na September 9, 13 aro 16 tarikrangko sualataha aro private membor-rangni business-na September 12, 14 aro 15 tarikrangko donatskaaha.
Business Advisory Committee-ni tom·anio dongpae bakko ra·anggipa gipin manderangara, Opposition dolni dilgipa Dr Mukul Sangma, Deputy Chief Minister aro Parliamentary Affairs Minister Prestone Tynsong, MLA Ampareen Lyngdoh aro sakgipin MLA Balajied Kupar Synrem ong·a.
