Umsning-oni Jagi-ona dakanggipa ramako tarina pangchakaniko songa

SHILLONG: Umsning-oni Jagi-ona dakanggipa ramako tarina gita Budbar salo, a·dokni Chief Minister Conrad Sangma, a·dokni Cabinet Minister Dasakhiatbha Lamare-ni dongpaanio pangchakaniko songe on·angaha.
Umsning-oni Jagi-ona dakanggipa ramara Umsning-ni NH-6-o donggipa 51-gipa kilometre-oni a·bachenge, Assam aro Meghalaya-ni simao donggipa Umsiang songo bon·egipa rama ong·a aro ia ramani km 40.13 ong·gipa ramako Meghalaya Integrated Transport Project (MITP)-ni ning·o taridapna gita World Bank, gong 83,38,49,016 tangkarangko chamataha ine u·iataha.
Ia ramana pangchakaniko songe on·anganio a·dokni Chief Minister, jinmana aganprakatengon, ia ramachi Ri Bhoi a·jao komibeoba dam 17 songrang nangdimeatako man·engani gimin ian Ri Bhoi a·jao mongsonggipa ramarangoni dilsa ong·enga ine parakataha.
Ri Bhoi a·jani manderangna ia ramara mongsonggipa rama ong·ani gimin ia ramako sorkari, ta·raken matchotate on·na miksongenga ineba Sangma aganaha.
Ia ramako bilsi 40 batpile tarigija galchipe donahachim ine janapatengon, ia ramako PA Sangma sagijni chief minister ong·engmiting somoiosa skanggipa changna black topping on·e tarichengaha aro da·o bilsi 40-ni ja·man ia ramako ua a·dokni manderangna tarie on·taienga ine Chief Minister parakataha.
Meghalaya a·dokni mongsonggipa rama jal·langrangko NPP-chi dilenggipa MDA sorkari, tarie on·na a·bachengataha ineba ia tom·anio Chief Minister parakataha.
Ia ramana pangchakaniko songe on·angani somoio dongpae bakko ra·anggipa gipin manderangara, MLA Wailadmiki Shylla, sakgipin MLA Jason Sawkmie Mawlong aro gipinrang ong·a.