SHILLONG: Federation of Khasi, Jaintia & Garo People (FKJGP)-ni gitcham president Wellbirth Rani, United Democratic Party (UDP)-o napangaha.
Rani baksana una kam ka·enggipa bang·bea manderangba apsan somoion UDP-o napangtokaha.
UDP-o napangani ja·man kobor ra·timgipa manderang baksa agangrikengon, una party tikitko on·genchimode ua re·baenggipa 2023 bilsini Assembly election-o susana tarimanaha ine Rani parakataha.
A·doko joltangni dolchian namroro silroroaniko ra·bana miksonganiosa ua UDP-o napangaha ineba FKJGP-ni gitcham president parakataha.
NGO-ni dilgipa ong·e ua je kamrangna ku·rangko on·dilachim apsan daken da·o political dolni dilgipa ong·eba ku·rangko on·angkugen ineba Rani aganaha.
Rani-ni UDP-o napani gimin UDP-ni president Metbah Lyngdoh, talataniko on·angskaengon, ua UDP-ko bilakdapatna miksonganiosa UDP-o napaha aro party-ni tikitko nangnikede napjaha ine parakataha.
Mawphlang constituency-na UDP-ni tikitko da·o ong·enggipa MLA Eugeneson Lyngdoh-nan on·piltaigen ineba UDP-ni president parakataha.
