TURA: Sukrobar salo, Meghalaya a·dokni Chief Minister Conrad K Sangma, Tura-ni Rongkhon-o donggipa College of Teachers Education (CTE)-ni gital building aro chatro chatrirangni hostel-rangko nokdonggae on·angaha aro ia gital nokrangko nokdonggae on·anio North Tura-ni MLA Thomas A Sangma-ba dongpae bak ra·angaha.
College of Teachers Education (CTE)-ni ia gital building aro hostel-rangko rikna gita a·dok sorkarini ra·gatgipa Supporting Human Capital Development in Meghalaya-ni ning·o gong kror 18.04 tangka paisarangko Asian Development Bank (ADB) dakchake on·ahachim.
Tura-ni Rongkhon-o donggipa CTE-ko 1993 bilsio kuliahachim aro ia college-ko kulianichi skigipani kamko ka·na sikgipa bang·a manderangan, B.Ed degree-rangko dake, dingtang dingtang skul aro college-rangko skigipani kamko ka·na cholrangko man·tokengahachim.
CTE-ni gital building aro chatro chatrirangni hostel-rangko nokdonggana gita tom·aniko ong·atanio a·dokni Chief Minister Conrad Sangma, jinmana aganprakangengon, 2018 bilsio a·dok sorkariko jako ra·chengaonin uni sorkari, lekka porako mongsongbatgipa ong·ate, a·doko lekka porani gadangko nambatatna gita bang·bea tangka paisarangko chame on·aha ine parakangaha.
Uni sorkariko rikchengani somoirango a·doko lekka porani kamrangko namdapatna gita maming cholrang aro niamrang dongjachim ine janapatengon, lekka porako namdapatanio man·enggipa ra·bianirangko aro neng·nikanirangko uamang sandie ia sorkari, lekka porako tang·doatna gita cholrangko sandie kam ka·aha ine Sangma aganaha.
Lekka porani kamrangko ta·rakede namdapatna man·jawa ine janapatengon, dingtang dingtang dolrang, chatro chatrirang, skigiparang aro jatko dilenggiparang apsan ku·mong nangrime kam ka·anichisa dingtanganiko ra·bana man·gen ine Chief Minister parakataha.
CTE-ni gital building aro hostel-rangko rikna gita gong kror 18 tangkarangko chamaniara sorkarina dal·begipa ra·biani ong·ahachim ine janapatengon, a·doko lekka porani gadangko tang·doatna sorkarini kang·kare kae kam ka·anichi ia building aro hostel-rangko matchotate on·na man·aha ine Chief Minister parakataha.