SHILLONG: Meghalaya a·doko dingtang dingtang dolrang, Tetelia-Byrnihat railway project-ko jegalsotokengani gimin Meghalaya a·dokni simao donggipa Assam a·dokon chongipa railway station-ko rike matchotatna North East Frontier Railway (NFR) miksongengachim indiba ia biapo a·arang dongjae neng·nikanirangko chagrongna nangenga ine kobor on·aha.
Tetelia-Byrnihat railway project-ni ning·o NFR, batanggimin bilsirangonin rel ramako Byrnihat-ona taribana jotton ka·engachim indiba Meghalaya a·dokona rel gari ra·baaniko dingtang dingtang dolrang jegalsotokengani gimin ia project-ko matchotatna man·jae, Assam a·dok ning·on chongipa railway station-ko rike ia project-ko bon·atskaha miksongengachim ine official-rang parakataha.
“Meghalaya a·dokni dingtang dingtang dolrang, rel garirangko champengsotokengani gimin chinga Assam-Meghalaya simaon banoba chone railway station-ko rikenba ia project-ko chipna miksongengachim indiba chingo a·arang dongjae chinga neng·nikanirangko man·na nangenga,” ine NFR-ni official saksa aganaha.
Koborko on·ani gitade, Tetelia-Byrnihat railway project-ni kamrangko ka·anio Assam a·dokchipakde namen chu·sokengachim aro da·o bangki dongenggipa kamrangkoba wachi ra·gatahaon a·bachengpiltaina siengahachim.
Ia project-ko Meghalaya a·dokchipakniba name chu·sokatna man·na gita NFR-ni official-rang, jegalenggipa dolrangko gronge agangrikna jotton ka·ahachim indiba ia dolrang, NFR-ni official-rangko grongna jechaktokaha ineba kobor on·timgiparang parakataha.
Meghalaya a·dokona niam gri napsrukanirangko champengna gita rakgipa niamrangko ra·gatchenggija rel garirangko ra·napbagenchimode niam gri napsrukanirang bilongbatgnok ine dingtang dingtang dolrang, Ri Bhoi-Khasi Hills aro Jaintia Hills a·jarango rel gari ra·napbaaniko raken jegalsotokengachim.
2017 bilsionin Tetelia-Byrnihat railway project-ni kamrang, Meghalaya a·dokchipakde bon·chongdikahachim aro untalan Ri Bhoi aro Khasi Hills a·jarangona rel ramarangko tariangna man·kujaengachim ine nikna man·a.
Ia Tetelia-Byrnihat railway project-ara, km 21.50 ong·gipa rel ramani project ong·achim aro ianoni km 19.25-de Assam a·doko aro km 2.25-de Meghalaya a·dok ning·o ong·engachim.
