TURA: East Garo Hills a·jao High Court-ni bench baksana GHADC-ni court bench aro branch office-rangko kulichina gita Williamnagar Bar Association (WBA) dabiengon, ia dabianio Williamnagar-ni dolbri NGO-rang, chong·motan GSU, FAF, FKJGP aro AIGU dolrangba chakpaaniko parakataha.
Williamnagar Bar Association-ni dabianio bakrimpaaniko parakatengon, Meghalaya a·dokko man·aoni da·o bilsi 50 gapaniko maniengahani gimin East Garo Hills a·jao High Court-ni bench, GHADC-ni court bench aro GHADC-ni branch office-rangko kulichina dabianiara namen nangchongmotgipa dabianian ong·enga ine dolbri NGO-rang parakataha.
“Ia jolrango songdongenggipa ramram aro cholgri manderangnaba kakket bichalko aro mandena on·gimin bilko on·na aro jakkalna man·na gita High Court-ni Bench aro GHADC-ni court bench baksana branch office-rangko on·na nangchongmotenga. A·doko namroro silroroaniko ra·bana gitaba iako nangchongmotenga,” ine GSU East Garo Hills Williamnagar-ni president Saljrang Tengrik R Marak parakataha.
GHADC-ni court bench aro GHADC-ni branch office-rangko East Garo Hills a·jao kuligenchimode, ian jolo songdongenggipa manderangna namgnirangko ra·baan baksana GHADC-ni kamrangko nambate ka·na dakchakani ong·gen ineba dolbri NGO-rang parakataha.
Iani bidingo jolni manderangna u·iatanirangko on·anichi ia dabianiko bilakbatatgen ineba NGO-rang parakataha.
Williamnagar Bar Association-ni dabiangani ja·man, adita salrangna skangsan, A·chik Organisation for Social Welfare (AOSW) dolba, Garo Hills Autonomous District Council (GHADC)-ni Court Bench-ko East Garo Hills a·jani headquarter Williamnagar-o donchina gita dabiangahachim ine nikna man·a.