SHILLONG: Meghalaya a·dokni BJP dol ning·o meligrikgijanirang ong·engani gimin ia meligrikgijanirangko namatchina gita ge·etaniko on·manahaoba, iani bidingo BJP-ni Meghalaya in-charge M Chuba Ao, BJP-ni dilgipa BL Santosh baksa agangrikgen ine parakataha.
Sombar salo M Chuba Ao-ni kobor ra·timgiparangna parakatani gitade, adita salrangni gisepon ua BJP-ni general secretary BL Santosh-ko Nagaland a·doko grongna sienga aro uko gronganio somoio ua Meghalaya a·doko BJP dilgiparangni meligrikna man·jaenggipani bidingo agangrikna sienga.
Meghalaya a·dokni BJP dol ning·o ong·enggipa obostarangko ma·mongni BJP dilgiparangba namen ma·sienga ine janapatengon, Meghalaya a·doko ong·enggipa obostarangko ua BL Santosh baksa namatna jotton ka·gen ine Ao parakataha.
Meghalaya a·dokni BJP dol ning·o meligrikgijanirangko nikna man·engahachim aro da·o BJP dol ning·o baditaba dol dake ma·ekanirangkoba nikna man·engahachim.
Sombar salo, BJP Meghalaya-ni state president Ernest Mawrie-de Tura-ona re·bae, Garo Hills gimikni dilgiparang aro BJP-na kam ka·enggipa manderangko grongeskaahachim ine nikna man·a.
