TURA: Adita salrangna skang rim·ako man·gipa Tura-ni MDC Bernard N Marak-ni ning·o chalaienggipa Meghalaya Chamber of Commerce (MCC)-ni manderang, Tura-o dokkan dakenggiparangoniko kajinarangko gile ra·engani a·sel ma·manti bostuni damrang aro mongsongbate cha dokkanrango man·gipa cha·ani bosturangni dam rakbatahachim ine matnangenba, Tura MCC-ni kosako Police-rang FIR ka·doangaha.
Batanggimin jarangonin ma·manti cha·ani bosturang, jekai misti, samosa, chop aro uandakgipa cha·ani bosturang dam rakbatahani gimin Tura jillao songdongenggipa manderang badi ka·tokengachim ine nikna man·a.
Indake ong·engon, manderangni badi ka·anirangko man·soenba police-rang, dokkanrango palenggipa cha·ani bosturang dam rakbatengani gimin am·sandianirangko dakon, ia dokkanrangko MCC-ni manderang didiahani a·selsa cha·ani bosturangni dam rakbatahachim ine ma·sina man·aha aro ia dolko Bernard N Marak-ni ge·etanio, Wilver Danggo M Marak, Anish M Sangma, Patcheng T Sangma aro gipinrang chalaiengachim ine ma·sina man·aha ine West Garo Hills a·jani Superintendent of Police (SP) VS Rathore parakataha.
“Cha dokkanrango man·gipa cha·ani bosturangsan ong·aigija, biterang, me·su samjakrang, do·chirang, be·en bitinrang aro uandakgipa gipin bosturangni dam rakbatahani a·sel ramram manderang aro mongsongbate kangal cholgri aro sagipa ding·gipa manderang neng·nikanirangko man·na nangtokenga ine chinga badi ka·anirangko man·soenba, am·sandianirangko dakon, Bernard N Marak-ni ning·o chalaienggipa MCC-ni manderang, dokkan dakgipa manderangoniko membership fee aro jaanti renew ka·ani fee ine pa·sike tangkarangko gile ra·engani a·selsa dokkanrango bosturangni dam rakbatenga ine chinga ma·sina man·aha,” ine SP parakataha.
Iandake cha·ani bosturang dam rakbatengani a·sel manderang neng·nikanirangko man·na nangtokengani gimin adita salrangna skang, SP office-ni gita Tura-o dokkan dakenggipa manderangko okamatenba, dingtangmancha tom·aniko ong·atangaha aro ‘Sweets and Confectionaries Association of Tura’ ine dolko songe donangaha ine kobor on·aha.
Ia tom·anio association-ni gita tom·enba dingtangmancha cha dokkanrango man·gipa cha·ani bosturangni damrangko komiatpilna gitaba tik ka·e donangaha ine u·iataha.
