TURA: Budbar salo, Tura Don Bosco College (DBC)-ni ning·o donggipa Physics department-ni gita National Renewable Energy Day ba Akshay Urja Diwas-ko Don Bosco College-ni B.Sc chatro chatrirangna manidilangaha.
National Renewable Energy Day-ko bilsiantian August-ni 20 tarikosa manirongengachim indiba ia bilsio ia salsa chuttini sal ong·ahani gimin ia salko Don Bosco College-o August-n i 24 tarikona ra·doe maniangskaaha.
August-ni 20 tarikara a·songni gitcham Prime Minister Rajiv Gandhi-ni atchiani sal ong·ani gimin ia salko gisik ra·na gita India sorkarini New & Renewable Energy Ministry, ‘National Renewable Energy Day’ dake ra·gatskaahachim aro bilsiantian August-ni 20 tariko ia salko manirongengachim.
Tura Don Bosco College-o ia National Renewable Energy Day-ko manianio Tura Government College-ni skigipa Reuter Balzack M Sangma, skigipa ong·e re·baenba, chatro chatrirangna ia salko maniani bidingo aro Renewable Energy-ni bidingo agan-talate on·anirangko dakangaha.
Ia program-ko ong·atanio dongpae chatro chatrirangna aganprakanggipa gipin manderangara, Don Bosco College-ni Principal Fr Bivan Rodriques Mukhim, Physics department-ni head Mahidhar Rajbongshi aro gipinrang ong·a.
