SHILLONG: 2014 bilsi dipetan Meghalaya a·doko niam gri koela bikotaniko National Green Tribunal (NGT) champengatahaoba da·omangba a·dokni dingtang dingtang koela a·damrango niam gri koela bikotaniko nikna man·engkua aro adita salrangna skangsan, West Khasi Hills a·jani Uruk songo donggipa koela a·dam a·sel ong·anichi iandake niam gri koela bikotaniko paraktaiaha.
Meghalaya a·doko niam gri koela bikotaniko NGT champengna skangde a·dokoni aro a·palrangoniba gimik sak lak 2-mangni gita koela bikotani aro koela badinganio jak dongachim aro ia manderang, a·dokni koela a·damrangoniko koela bikotenba gipin biaprangona badingate bang·en laprangko man·ahachim.
Indake ong·genchimoba, a·doko niam gri koela bikotaniko NGT champengataonin, a·doko aro gipin biaprangoni re·bae koela badinggipa manderangba nangchakeaniko man·na a·bachengaha.
Koela bikotanichi bilsiprakon a·dokna gong kror 600-mangni gita kajinarangko man·e on·na dakchakachim indiba a·doko niam gri koela bikotani aro koela salruraani a·selan a·dokni man·enggipa kajinarangko bon·atna a·bachengskaaha.
“Niam gri koela bikotaniko champengatani ja·man a·doko koela badinggiparang chol ong·jae, je cholchiba koelarangko bikote salrurana a·bachengtokskaaha aro koela bikotaniko champengatmanahani gimin kajinarangko sorkarina on·gija manderang an·tangtangan cha·goptokskaengaha,” ine South Garo Hills-o koela badinge cha·enggipa mande saksa aganaha.
Meghalaya a·doko niam gri koela bikotaniko champengatahaoba 2014 bilsionin koela bikotanirangko nikna man·engkua aro koelarangko badinganio sorkarini manderangan dakchake on·enga ineba mitam kobor on·timgiparang parakataha.
Meghalaya a·doko niam gri koela badinganiko champengchina dingtang dingtang dolrang dabitokengoba da·o dipet a·doko niam gri koela bikotani aro salruraa dongja ine sorkari a·kangskaengachim.
