Ampati: Party-tangko membor-rangko bang·dapatna, TMC Meghalaya Garo Hills-ni dingtang dingtang bakrangko raken kamrangko ka·enga aro Sukrobar salni bako party-ni gitalgipa membor, Afolf Lu Hitler Marak-ko, Ampatio Meghalaya TMC-ni dilgipa, Zenith Sangma, Dikkanchi D Shira, Winnerson D Sangma mangni dongpaanio, party-ona rim·chaksoaniko dakaha.
Indake, oko dongenggipa ma·giparangni sanchakram hospital-rangko, MDA sorkarini name nirokjaengani gimin, Meghalaya TMC-ni MLA Dikkanchi D Shira indake aganangaha, ”Oko dongengmitingo bang·a ma·giparangan, an·tangtangni janggirangko gimaatna gita nangaha. Anga uamangna sanchakani nokrangko rike on·a sikachim, indiba miksongani jatchio, MDA sorkari re·baaha.”
”Election-o susaani somoirango, Conrad Sangma poraiani gadangrangko namdapatna kam ka·ani gimin bang·en aganaha, indiba nibo an·chingni a·dok bon·kamgipa gadangni gittamgipaosa da·o ong·genga,” ine a·doko poraianirang tangonrikrikangengani gimin aganangaha.
Ramarang namrikrikangjaengani gimin gisiko suk ong·gijani giminba ua indake aganangaha, ”Dalu rama namtingtingjaani a·sel bang·a manderangan janggirangko gimaatna nangaha. Iarang pilakon name nipilna nangenga aro iarangni bidingo sorkariko singdona gita nangenga. Dr. Mukul Sangma an·tangan songo noko dal·bagipa ong·ani gimin, songo donggipa manderangni neng·nikaniko masigipa ong·a baksana uamangna kam ka·na nanganikoba namen masigipa ong·a. Dr. Mukul-ko Chief Minister-ni kamna seoktaigenchimode, ua pilak kamkon name ka·gen aro an·chingni a·dok silrorona man·gen.”
MDA sorkarini kam ka·na ka·sinani aro kam ka·na changjaani gimin, Meghalaya TMC-ni MLA Zenith Sangma, indake aganangaha, ”Batanggmin election-o chinga ge 21 seat-rangko man·aha aro NPP ge 19 seat-rangko man·aha. Bang·bate seat-rangko man·genchimoba, NPP sorkariko rikna gita man·aha, maina gipin party-rang uamang baksa chaprimaha. Indiba sorkari rikani ja·manode, uamang development-ni giminde name gualaha. Bebeko agangenchimode, uamang name tangka paisa cha·gipa manderang ong·a aro uamango a·dokni manderangni namgnirangna kamrangko ka·na sikani gisik dongja.”
”Manderangni namgnina aro manderangna, Dr. Mukul Sangma-ni chamgipa aro bikotgipa scheme-rangko, MDA sorkari ra·sekaha. Indiba da·ode, uamang apsan schemer-rangkon dingtang dingtang bimingrangko on·e dingtang dingtang biaprango mesokaniko dakengjok. CM Conrad Sangma, PMGSY-ni gitade a·doko namdapataha ine a·kange agana baksa dingtang dingtang nanganirangna tangkarangkoba man·bae on·aha ine aganenga, indiba PMGSY-ara ma·mong sorkarini scheme-sachim, haida CM Conrad Sangma iakode gualengakon,” ine ua aganangkuaha.
