TURA: Jasamangna Tura Police Station-o donako man·ani ja·man da·o Tura-ni BJP MDC Bernard N Marak, judicial custody-ko man·enba Tura district jail-o donatako man·aha.
Tura MDC-ni Rimpu Bagan-o gopretna jakkalgipa bosturangko man·ani gimin police-rangni ning·o donani re·anggipa Sombar salo matchotani ja·man Marak-ko Sombar wal dipet, Tura district jail-o donna gita raiko on·ataha.
Rimpu Bagan-o me·chik bi·sa saksako mande saksani drae til·ekgipa case-o pangchake ‘Rimpu Bagan’-o ong·gija kamrangko ka·na on·enga ine matnanganioba Tura-ni MDC-ko rim·ahachim indiba ia case-ode ua judicial custody-ko man·ahachim. Ia case-o ua judicial custody-ko man·ahaoba uni bagan-o gopretna jakkalgipa bosturangko aro adita silchidarerangko man·ahani gimin ia case-o pangchake uko police-rangni ning·o donchina Tura-ni kachari raiko on·attaiahachim.
Re·anggipa antion uko police-rangni ning·o donchina rai on·ani matchotgnokchim indiba ua somoio ua COVID-19 man·ahani gimin judicial custody-ni ning·o uko Tura hospital-o sanna gita watatskaahachim.
Hospital-oni jokpilani ja·man ua salbrina police-rangni ning·o donge da·o bon·kamao ua judicial custody-ko man·e Tura district jail-o donna gita watatako man·skaaha.