RESUBELPARA: Re·baenggipa 2023 bilsini Assembly election-na North Garo Hills a·jao United Democratic Party (UDP)-ni candidate-rang da·onin kamrangko ka·sona man·na gita, North Garo Hills a·jani UDP dol, Mendipathar Multipurpose Hall-o tom·e chanchirimangenba, dingtang dingtang constituency-rangna sakgittam candidate-ni bimingko Shillong-o donggipa UDP-ni dilgiparangna recommend ka·doataha.
Ia tom·aniko UDP North Garo Hills unit-ni president Luderberg Ch Momin-ni dilanio ong·atangaha aro tom·anio UDP-ni adviser BG Momin-ba dongpae bak ra·angaha.
UDP-ni tom·anio North Garo Hills unit-ni president Luderberg Momin-ko Kharkutta constituency-na, Rakman Ch Marak-ko Bajengdoba constituency-na aro Subroto G Marak-ko Mendipathar constituency-na candidate dake mingenba, a·doko UDP-ni dilgiparangna recommend ka·ataha.
Iani bidingo UDP-ni dilgiparang tom·e chanchirimangenba, ja·mano candidate-rangko ra·chakanggen ine kobor on·timgiparang parakataha.
