SHILLONG: Congress dolni saksa membor ong·e, National People’s Party (NPP)-na kam ka·enga ine matnanganiko Meghalaya Pradesh Congress Committee (MPCC)-ni president Vincent Pala raken jegalataha.
Iani bidingo sing·anina aganchakaniko on·angengon, basakoba uko NPP-na aro basakobade BJP-na kam ka·enga ine matnangtokenga indiba iandake matnanganiranga kakket ong·ja ine Pala parakataha.
Uko dingtang dingtang dolrango napchina didiahani gimin ua Congress doloni ong·katgenchimode basakonin ong·katenggnokchim ine janapatengon, “Chinga NPP dolni kosakon dakgrikenga aro angko darangba iandake dam nom·e brena man·jawa,” ine Pala parakataha.
An·tangni kosako matnanggiparangko tol·giparang ine janapatengon, tol·gipa mandede pangnan tol·gipa ong·aigen ine Pala parakataha.
HM Shangpliang BJP-o napskaengahani gimin uko Congress dolo nokchakkuaigenchimma ine sing·on, Mawsynram-o Congress dol, dingtangmancha candidate-ko donmanaha aro ua kamrangko ka·engaha ine MPCC-ni president parakataha.
“Chingko wate katgiparangna chinga cholrangko on·manaha aro je biaprangon chingni gitcham MLA-rang dongjachim, uandakgipa biaprangode chinga rakbee kamrangko ka·skaenga,” ine Pala aganaha.
Uni MPCC-ni president ong·a bakan Mukul Sangma aro uni manderang Congress dolko wate TMC-o napskaaha ine ku·chakangengon, TMC dolni ning·on da·o baditaba dol dake bak ong·aha aro NPP-na kam ka·enggiparangba da·o Congress-ona re·batokskaaha ine Pala parakataha.
MPCC president-ni parakatani gitade, Congress dolo da·o namnamgipa aro dambekuenggipa candidate-rang dongaha aro manderang bang·batan Congress dolna chakengkuani gimin ia election-o gipin dolrangna baten Congress nambate dakna man·gen.
Ia election-o badiaba badiaba biaprangona agrede tangka paisani kam inditana choligipa ong·jawa ine janapatengon, tangka paisarangchi election-o susagiparang, manderangko changgni togina man·naba gnang indiba changgittamde man·jawaha ine Pala parakataha.
Ia election-o Congress dol, Umsning, Mawkyrwat, Nongstoin, Mairang, Nongpoh aro Jaintia Hills-oba bilaken dakgrikna sienga ineba MPCC-ni president parakataha.
