W’nagar-o gong kr 121-ni Water Supply Project-na pangchakaniko songa

TURA: Williamnagar-o Housing & Urban Affairs Ministry-ni ra·gate on·gipa gong kror 121-ni Urban Water Supply Project Phase-I-na pangchakaniko mijal Bristibar salo, Housing & Urban Affairs-ni Union Minister of State (MoS) Kaushal Kishore aro Meghalaya a·dokni Chief Minister Conrad Sangma, pangchakaniko songe on·angaha aro ia tom·anio a·dokni PHE Minister Renikton Lyngdoh Tongkhar baksana dingtang dingtang dilgiparangba dongpae bak ra·angaha.
Ia Water Supply Project-ara AMRUT 2.0-ni ning·o Housing & Urban Affairs Ministry-ni ra·gatgipa project ong·a aro ia project-ko ra·gatanichi Williamnagar-o songdongenggipa manderang, 2050 bilsiona kingking chirangko man·gnok ine u·iataha.
Ia water supply project-na chirangko salprakon litre 8,33,335-ko nangenga aro iana East Garo Hills a·jao donggipa Chibe chibisikoniko chiko salbana gita sorkari tik ka·e donmanaha ineba u·iataha.
Ia Williamnagar Urban Water Supply Project-ni skanggipa bakna pangchakaniko songe on·anganio Housing & Urban Affairs-ni Union Minister of State Kaushal Kishore, jinmana aganprakangengon, ia Williamnagar Water Supply Project-ara Williamnagar-o donggipa nokantinan chirangko on·na gita sorkarini a·bachengatgipa project ong·a ine parakataha.
A·songni Prime Minister Narendra Modi, salgro salaram jolrango namroro silroroaniko ra·bana kang·kare kae kam ka·enga ine janapatengon, salgro salaram a·dokrangko tang·doatna gita sorkari, dingtang dingtang program-rangko ra·gate on·aha ine Kishore parakataha.
Meghalaya a·doko namroro silroroaniko ra·bana tikkele kamrangko ka·dilenga ineba ua dingtangmancha a·dokni Chief Minister Conrad K Sangma-koba mittelpilangaha.
Ia pangchakaniko songe on·anio a·dokni Chief Minister Conrad Sangma-ba jinmana aganprakangengon, Williamnagar jillao songdongenggipa manderangni namgnina ia project-ko ra·gate on·ahani gimin ua dingtangmancha Housing & Urban Affairs Ministry aro Union Minister of State Kaushal Kishore-koba mittelpilangskaaha.
Water Supply scheme-ni ning·o donggipa dingtang dingtang project-rangni gimin jinmana parakatengon, a·dok gimiko gong kror 2000-ni project-rangko sorkari a·bachengate kamrangko ka·engaha ine Chief Minister parakataha.
East Garo Hills a·jani namroro silroroanina ra·gatgipa kamrangni gimin janapatskaengon, Williamnagar jillani ning·o donggipa ramarangko taridapna gita gong kror 25-ni project-ko sorkari ra·baenga ine Sangma parakataha.
Ia tom·aniko ong·atanio Williamnagar-ni MLA Marcuise Marak, Rongjeng-ni MLA Jim Sangma aro Rajabala-ni MLA Abdus Saleh-ba dongpae bakko ra·angaha.