SHILLONG: Meghalaya a·dokni diltugipa biaprango niam gri koela bikotaniko nirikkina neng·ani ong·enga indiba police-rang niam gri koela bikotaniko champengna rakbee kamrangko ka·enga ine Bristibar salo, a·dokni Home Minister Lahkmen Rymbui parakataha.
Adita salrangna skang, West Khasi Hills a·jani Urak (Riangdim) songo donggipa koela a·damo a·sel ong·gipani bidingo janapatengon, iandake diltugipa biaprango nirok sandianiara police-rangnaba namen neng·beani kam ong·enga maina iandakgipa biaprangona re·na gita komibeoba konta dok ba konta snimang nanga ine Home Minister parakataha.
“A·dokni manderangan iandakgipa kamrangni bidingo police-rangna kobor on·engani gimin anga kusi ong·a aro banoba diltugipa biaprango niam gri koela bikotanirangko kobor man·enga ong·ode police-rang, iandakgipa biaprangona ta·raken sokna jotton ka·enga,” ine Rymbui aganaha.
Adita salrangna skang, Urak songo koela be·grudape a·sel ong·anichi mande saksa janggitangko gimaatna nangahachim aro sakgipin bilongbee saknaanirangko man·na nangahachim.
Ia biapara West Khasi Hills a·jaon ong·genchimoba ia biapona South Garo Hills a·ja gitan re·tobatachim.
Shallang-oni Urak-ona ja·achi doanggenchimode komibeoba konta gittammang nanga indiba ia biapona South Garo Hills a·jani Jadi songonin seng·sotbatskaachim.
Garo Hills-ni simao donggipa West Khasi Hills aro South West Khasi Hills a·jarango niam gri koela bikotaniko nirikkina gita police-rangna neng·begipa kam ong·enga indiba police-rang, man·a dipetde niam gri koela bikotanirangko champengna jotton ka·enga ine Home Minister parakataha.