SHILLONG: Police department-ni gari jakkalsretani aro pilak ong·gija dakgipa kamrangni bidingo chubata gadangchi inquiry dakchina dabiani da·o bilakbatrorobaengaha.
Iani bidingo kobor ra·timgipa manderang baksa agangrikengon, Police-rangni bil jakkalsretaniko ma·sina gita name am·sandina nangchongmota ine Sukrobar salo, United Democratic Party (UDP)-ni dilgipa Paul Lyngdoh parakataha.
“Police-rangni report-ko ning·tubate am·sandina nangenga aro dos donggipa official-rangkode, je gadangniba ong·china, nanga gita ja·kurangko de·na nanga,” ine Lyngdoh aganaha.
Ia kamo matnangako man·enggipa SF-10-ni Commandant GK Iangrai baksana gipinrangba jak dongenggenma ine sing·on, iani giminsa ia mamlani bidingo ning·tubate am·sandianirangko dakna nangenga ine Lyngdoh parakataha.
Police department-ni ong·gija dakanirangko a·dokni Chief Minister Conrad Sangma-ni jegalna jotton ka·engani gimin sing·on, Chief Minister-de an·tangni kam ka·toani gitasa ka·aigen ine Lyngdoh parakataha.
“Basakobade kakketara an·chingna man·dikaniko ra·baa indiba an·ching ong·gija dakgipa kamrangko bon·atna gitade, ning·tubate am·sandianirangko dakna nangao ga·aka,” ine UDP-ni dilgipa aganaha.
Apsan daken Voice of the People’s Party (VVP)-ni president Ardent Miller Baisaiawmoit-ba ia mamlani bidingo CBI-chi am·sandianirangko dakna nanga ine dabiangaha.
Kakketko ma·sina gitade ia obostani bidingo jakgitele am·sandianiko dakna on·anian ong·aigen ineba ua aganaha.
“Iani bidingo chief minister-ni gipinrangko matnanganiara namen kragijani ong·enga. Ia sorkarini ong·gijagipa kamrangna ku·rang on·enggipa media aro NGO-rangkosa chief minister matnangskaenga,” ine VPP-ni president parakataha.
Maming dongnuani gri ong·china chief minister-ko didiatengon, ia mamlako CBI-chi inquiry dakna on·genchimosa iade ong·na amaigen ine Basaiawmoit parakataha.
Police-rangni garirangko jakkalsretani bidingo am·sandina gita high level inquiry commission-ko songchina gita Chief Minister-ni adviser aro BJP-ni dilgipa AL Hek-ba dabiangahachim ine nikna man·a.