SHILLONG: NPP-chi dilenggipa Meghalaya Democratic Alliance (MDA)-o bakrimaniko ra·pilna gita BJP-ni ka·mikkenataniko NPP-ni chadambe dol National People’s Youth Front (NPYF)-ba raken jegalataha.
“MDA sorkarioni ong·katna BJP-ni ka·mikkenataniara ian skanggipa chang ong·ja. Uamang batanggimin changrangoba apsan daken MDA-oni ong·katna aganahachim indiba sorkarion dongkuaiaha. ‘Sing·wakwakgipa achakde chikrongbreja’ ine agananiko an·ching knana man·a aro ian BJP dolna krachongmota,” ine NPYF-ni spokesperson Bajop Pyngrope, ia jani gisepon BJP dol, NPP-chi dilenggipa MDA-o bakrimaniko watnaba gnang ine BJP-ni Meghalaya in-charge M Chuba Ao-ni agangipa kattarangna aganchakaniko on·ataha.
Assembly election-na da·o adita jarangsan dongaiahani giminsa BJP dol, iandakgipa politics-ko kal·na jotton ka·enga ineba NPYF-ni dilgipa parakataha.
“Bilsibri atamangna uamang sorkarini bak ong·e pilak namgnirangko man·ani ja·man da·osa BJP dol, MDA-oni ong·katna ka·mikkenatenga,” ineba Pyngrope, jean KHADC-ni NPP MDC-ba ong·achim, BJP-ni kosako matnange parakataha.
BJP gride darangba a·doko sorkariko rikna man·jawa ine a·kanganiara ka·dingna aganani gitasa ong·aia ineba NPYF-ni ku·wattimgipa parakataha.
“Re·baenggipa bilsio NPP, doltangari sorkariko rikna sienga. Chinga ia chango dam 30-na baten seat-rangko chena nisan donenga aro manderangni bakrimanirangko nike chinga iako chu·sokatna ka·dongenga,” ine Pyngrope aganaha.
