TURA: Deficit skulrango skigiparangni dingtang dingtang dabianirangko a·dok sorkarini chu·sokate on·jaengani gimin da·al September-ni 5 tariko Teachers Day ba Skigiparangni salko manianio, Garo Hills-ni deficit skigiparang badge gisimko gane mesokna tik ka·angaha.
Garo Hills Deficit School Teachers & Employees Association (GHDSTEA)-ni parakatani gitade, skigiparangni dormaharangko bariatchina, DCRG-ko gong lak 3-oniko gong lak 10-ona bariatchina, deficit skulrango skigiparanna taridapgimin ACPS-ko ra·gatchina, deficit skulrango skigiparangna service rule-rangko matchote tarichina aro kamoni neng·takgimin skigiparangna social security benefit-rangko on·china dabiengachim aro ianoni mitamkode sorkari chu·sokate on·na ku·rachakahachim.
Iani bidingo GHDSTEA baksana Khasi Jaintia Deficit School Teachers Association (KJDSTA)-ba batanggimin somoirango a·dokni Chief Minister Conrad Sangma aro Education Minister Lahkmen Rymbui-na baditaba chang memorandum-rangko on·angaha aro Education department-ni official-rang baksana tom·e chanchirangahachim indiba skigiparangni dabianirangko da·onan chu·sokate on·kujaenga ine skigiparang parakataha.
“Chingni dabianirangko sorkari chu·sokate on·na ku·rachakanirangko on·ani ja·manoba da·onan maming ja·kurangko de·kujaengani gimin chinga skigiparangni salo, chingni suk ong·gijaniko mesokna gita badge gisimko ganna tik ka·aha,” ine GHDSTEA-ni dilgiparang parakataha.
Deficit skulrango skigiparangni dabianirangko sorkari knachakangkujagenchimode mikkangchi skigiparang badge gisimko gane mesokangkuan baksana bilakbate jingjengatanirangko dakangkugen ineba GHDSTEA-ni dilgiparang, mikrakataniko on·angaha.