TURA: Garo Hills-ni B-Mahal jolrango songdongenggipa manderangna maming neng·nikanirangko ra·bajana gita Garo Hills Autonomous District Council (GHADC)-ni Executive Committee tom·e chanchirimangenba, B-Mahal-ni bidingo gitcham chief executive membor (CEM) Benedic R Marak-ni ra·gatgipa niamrangko ra·galpilna gita tik ka·angaha.
GHADC-ni ning·o donggipa Land & Revenue Department-oni u·iatani gitade, B-Mahal ning·o donggipa nokdangrangna bigha gni ka·e on·enba, bangki dongkuenggipa a·arangkode ra·pilna gita GHADC-ni gitcham CEM, tik ka·e donangahachim indiba uni iandake tik ka·giminko GHADC-ni da·o ong·enggipa Executive Committee ra·galatpilaha.
Je biaprangon manderang songdong a·chaengachim, uandakgipa biaprangkode GHADC nangateani dongjawa aro je biaprangon manderang songdong a·chaa dongjachim, uandakgipa biaprangosan namroro silroroatani kamrangko aro dingtang dingtang project-rangko ka·angaigen ineba GHADC-ni dilgiparang parakataha.
Ia jolrango namroro silroroaniko ra·bana aro manderangna kam ka·e cha·ani cholrangko on·na man·na gita manderangni songdong a·chaenggipa biaprangode maming nangateani donggija, MIDC, MTDC aro uandakgipa sorkari agent-rang baksa nangrimaniko ba songgigrikaniko jako ra·angkuna gitaba GHADC tik ka·e donangaha ine u·iataha.
Iandakgipa ja·kuko de·aniara, jolni chadamberangna kam ka·e cha·ani cholrangko ong·katate on·anisan ong·aigija GHADC-ni economy-ko tang·doatna, gipin biaprangoni niam gri napdrabae songdong a·chaaniko chel·chakna aro a·dok damgnini gisepo Inter State Boundary Vigilance Cell-ko songna cholko on·ani gita ong·gen ineba GHADC-ni Land & Revenue department parakataha.
Indake ong·engon, ia kamrangni bidingo jolni manderangna agan-talate on·anirangko dakna gita bakan B-Mahal ning·o ga·akgipa biaprango awareness program-rangkoba ong·atna GHADC tik ka·aha ine u·iataha.
West Garo Hills aro North Garo Hills a·jani ning·o ga·akgipa B-Mahal-ni mitam biaprangko GHADC-ni dilgiparang, MIDC aro MTDC-na palaha ine dingtang dingtang dolrang matnangtokengachim ine nikna man·a.
