BAGHMARA: Mongolbar salo, South Garo Hills a·jani District Statistics Office-ni gita, Statistics-ni kamrangni bidingo agan-talataniko on·na gita sensitization program-ko Baghmara-ni Krima III Training Hall-o ong·atangaha.
Ia program-ko ong·atanio South Garo Hills a·jani Additional Deputy Commissioner RC Momin, mongsonggipa sokgipa ong·e bakko ra·angaha aro tom·anio ua jinmana aganprakangengon, mandeni janggi tanganio maikai Statistics-ara mongsonggipa bak ong·achim, uarangni gimin talataniko on·angaha.
South Garo Hills a·jaosan ong·aigija a·dok gimikon hisapani kamrangko ka·na gita Economics aro Statistics-ara mongsonggiparang ong·a ine janapatengon, Economics aro Statistics-chi a·doko ong·enggipa korosrangko tarina dakchake da·o mikkang bilsi bongana tarisoanirangko ma·siatna dakchakani ong·a ine Momin parakataha.
Ia program-ko ong·atanio Statistics-ni kamrangko name skie ra·enba, mandeni salanti janggi tanganio nangchongmotgipa u·ie ra·na nanganirangko u·i-ma·sie ra·china gitaba ua program-o bak ra·giparangko didiangaha.
Ia sensitization program-ko ong·atanio agan-talate on·anggipa manderangara, Economics & Statistics Directorate-ni Research Officer DTN Sangma aro sakgipin Research Officer BG Momin ong·a.
