SHILLONG: Je manderangan, Assam aro Meghalaya a·dokni simarango tom·tomaniko ra·bapilna agangrikaniko nangnikjaenga, uamangde opposition dolna pu·onna man·aigen indiba tom·tomaniko nangnikenggiparangde NPP-na pu·onna man·aigen ine Mongolbar salo National People’s Party (NPP)-ni state president aro Rajya Sabha MP WR Kharlukhi parakataha.
A·dok damgnini simarango songdongenggipa manderangni bilsi 50-na duk chake janggi tangna nanganiara namen ru·utbegipa somoi ong·aha ine janapatengon, indita bilsirangna ia jolrang songdongenggipa manderangni duk chake janggi tanganiko bon·atna nangnikesa a·dok sorkari, ia ja·kuko de·aha ine Kharlukhi parakataha.
“Uni gimin je manderang a·dok damgnini simarango ong·enggipa golmalrangko nangnikjaenga, uamangde opposition dolna pu·onna man·aigen aro je manderangan ia neng·nikanirangko namatna sikengachim, uamangde chingna pu·onskana man·gen. Ia jolrango songdongenggipa manderangni duk chake janggi tangkamaniko chinga nikna sikja,” ine Kharlukhi, a·dok damgnini soi ka·grikaniko Trinamool Congress (TMC)-ni matnangrongengani gimin aganaha.
Opposition dolde jegaltimgipa dol ong·ani gimin sorkarini kamrangko jegalaigen aro sorkarini namgipa kamrangkoba mittelpilani dongjawa ineba NPP-ni state president parakataha.
“An·ching bang·bata somoirangon kamrangko politics-ni gitasa niatrongaia aro ian nama ong·ja. Basakobade an·ching an·tangtangni giminsan chanchiaigija manderangni namgnini giminba chanchina nanga,” ine ua aganaha.
2011 bilsio Langpih-o a·sel ong·e sakbri manderang siangna nanggipani gimin janapatengon, “Ua somoio an·chingni sorkari, ia manderangko so·otgipa Assam police-rangni kosako maiko dakaha? Uamangko rim·na nangachimba,” ine Kharlukhi parakataha.