TURA: West Garo Hills a·jani Dalu C&RD Block-ni ning·o donggipa Thekmanpara aro Tekpara songrango skul nokrang namsrangjahani a·sel skulo poraienggipa bi·sarang aro skie on·enggipa manderangba neng·nikanirangko chagrongna nangtokenga ine kobor on·aha.
Dalu jolo songdongenggipa mande saksa Sarbha Marak-ni kobor ra·timgiparangna parakatani gitade, Thekmanpara aro Tekpara song damgnion skul nokrang selpruprutokahani a·sel da·o gita wachini somoiode skulko ka·anio namen neng·nikanirangko chagrongna nangtokengachim.
“Thekmanpara skulo sak 35-mang aro Tekpara skulo sak 95-mangni gita chatro chatrirang donga indiba ia skul damgnion nokkingrang selprupruahani a·sel da·o gita mikka waani somoiode bi·sarang chu·gimikkode classroom-rango donna man·jaengaha. Mikkarang selani a·sel skulo poraienggipa bi·sarang aro skigiparangba neng·nikanirangko chagrongna nangtokenga indiba a·gilsakni seng·aniko nangnike ia bi·sarang skulona re·batokenga aro skigiparangba chakchike kamrangko ka·tokenga,” ine Marak parakataha.
Koborko on·ani gitade, ia skulni obostarangni gimin skulko chalaienggiparang, West Garo Hills a·jani Education department-na u·iatmanahachim indiba da·onan ia skul nokrangko taridape on·a dongkujaengachim.
Indake ong·engon, ia skul nokrangko tarie on·jaengani gimin aro skulo poraienggipa bi·sarangna simsak nirokanirangko on·jaengani gimin songsalna kamko ka·giparangoni saksa Maxbirth Momin, sorkariko sing·doataha.
“Sorkari rikchengaonin ia sorkari, lekka porana gisik on·e kamko ka·enga ine aganenga indiba iandake skulo poraienggipa aro kam ka·enggipa manderangna simsak nirokanirang dongjaenga ong·ode maikai a·doko lekka pora tang·dopana man·gen?” ine Momin sing·doataha.
Dalu block-ni ning·o donggipa skul nokrang namjae neng·nikanirangko man·tokenga
Date:
Share post:
