Ampati: Bristibar salo South West Garo Hills, Salmanpara MFC-o Zikzak ICDS Project-ni gita ‘Triggering POSHAN Panchayat for POSHAN Maah’ theme ba pangchakaniko done district level-o POSHAN Maah 2022-ko maniangaha.
District Programme Officer, ICDS (Cell) Tura, District Social Welfare Office, Ampati aro Betasing & Zikzak ICDS Projects baksa bakrime programme-ko ong·ataha. Programme-o Anaemia screening camp, recipe competition, awareness talk on nutrition, hygiene ba rongtal-an·talani aro gipin dingtang dingtang bidingrango aganprakangaha.
South West Garo Hills-ni Deputy Commissioner, Gideon Kharmawphlang, programme-o parakatengon indine aganaha, “joltango maming saa ba chemical gri ge·e-game man·gipa me·su-samjakrang aro sam-bol, bolam-biterango donggipa nutrition, an·chingni be·en-bimangna bilongen namgipa ong·a. Name rongtale cha·a-ringa, bewalrangara baditan gamchata, iarangni gimin aganaha. Uandake an·chingni be·en-bimangna salni teng·akoba nanga.”
Deputy Commissioner, ADC, A.V.D. Shira baksa, Recipe competition-o bak ra·e chegiparangna cash prize ba tangko suale on·aha.
ADC, A.V.D. Shira, me·chikrangni bilni gimin aganprakatengon, nokdango kajia-golmal ka·anio ba niam pe·anio maidakgipa legal right ba bilrangko jakkalna man·a, iarangni gimin skie agane on·angaha. District Immunization Officer, Dr. Noreen Sangma, a·nno donggipa, sok kangipa ma·gipa aro bi·sarangna nutrition baditan gamchata iani gimin skie on·angskaha.
Uandake DPO, ICDS (Cell), West, South & South West Garo Hills, C.D. Arengh, POSHAN Maah aro POSHAN Abhiyan-ni gimin talate on·angaha.
Programme-o Anganwadi worker-rang uamangni Supervisor, ASHAs, self-help group aro gipinrang bak ra·angtokaha.
