TURA: Assam aro Meghalaya a·dokni gisepo gari cha·ue watruraenggipa mande sakgittamko West Garo Hills a·jani police-rang, Bristibar salo rim·aha.
Police-rangni u·iatani gitade, ia manderangara, gari lekkarangko tol·e tarigiparangba ong·achim aro ia manderangoniko police-rang, gari lekka tol·e tarina jakkalenggipa laptop ge 3, mobile phone ge 3, Sim card ge 3, ATM/Debit card king 12, PVC card king 252 baksana motor bike bol 1, ATM card reader-rang, tol·e tarigipa registration certificate (RC)-rang, driving licence-rang aro gipin nangchakegipa bosturangkoba man·aha.
Meghalaya aro Assam a·dokni gisepo gari cha·uanirang batroroengani gimin ia bilsi a·bachengaonin police-rang, gari cha·ugiparangko sandie, gari cha·ugiparangko aro cha·ugimin garirangko bang·en rim·na man·engahachim.
Koborko on·ani gitade, police-rangni bilake kamko ka·anichi da·o dipet bol 114 cha·ugimin garirangko man·pilaha, sak 48 manderangko rim·aha aro gong lak 22 tangkarangko dai ra·e man·aha.