RESUBELPARA: Adita salrangna skang, North Garo Hills a·jani Mendipathar Multipurpose Hall-o National People’s Party (NPP)-ni tom·aniko ong·atangenba, gital membor-rangko dolona rimchaksoe gital office bearer-rangkoba seoke donangjolaha.
Ia tom·aniko ong·atanio GHADC-ni gitcham deputy CEM Dolly K Sangma, nominate ka·ako man·gipa MDCD Aldo Sangma aro GHADC-ni deputy chairman Crozier Sangma-ko man·chape dingtang dingtang dilgiparang bakko ra·angtokaha.
Ia tom·anio NPP Mendipathar Block-ni president-ko seokangengon, da·o block-ni president ong·enggipa Dolly K Sangma-kon president-na seoktaina gita jinma namnike ra·chakangtokaha.
Ia tom·a matchotani ja·mano GHADC-o nominate ka·ako man·gipa MDC Aldo Sangma, kobor ra·timgipa manderang baksa agangrikengon, re·baenggipa 2023 bilsini Assembly election-o North Garo Hills a·jani dambri constituency-rangon NPP chegen ine an·tangni ka·dongchakaniko parakatenba, a·doko Chief Minister Conrad Sangma-ni niksamsoe dilaniko nangengkua ine aganaha.
“A·dokni chief minister, Meghalaya a·dokna bang·en kamko ka·aha aro uni kamrangko nangengkua. Da·alo dingtang dingtang dolrangoni bang·bea manderang NPP-ona re·batokaha aro ian re·baenggipa bilsini election-o NPP dol, North Garo Hills a·jani dambri seat-rangko chegopgen ine mesokani ong·enga,” ine Sangma aganaha.
Da·o dipet name talbrekujaengoba, Mendipathar-ni AITC MLA Marthon J Sangma-ba NPP-o napna sienga ine jangbingbanganirangko knasona man·engachim aro ia tom·anio ua an·tangde dongpajahaoba uni jikgipade dongpae bakko ra·angskaahachim.
