Tura: Manderangni mikrakna nangenggipa a·selrangna, Assam-oni re·bae sana bananio ba samrangko palanio changgipa sapgiparangba gita tole, Meghalaya-o nape sagipa manderangna samrangko palenganiko, All Meghalaya Minority Students’ Union (AMMSU) jegalani iani bidingo nirokchina, a·dokni Drug Controller-na chittiko seataha.
”Badiaba manderang, Assam-oni re·bae samni dokanrangko niamgri kulie sagipa manderangna samrangko palenga. Ian bang·a manderangni janggi tanganiko nosto ka·na gita ama,” ine AMMSU-ni president, Nur Islam aganangaha.
AMMSU-ni aganani gitade, Garo Hills bang·en namnamgipa, choligipa aro kamgri dongenggipa pharmacist-rang donga, indiba gipin a·dokoni (Assam) re·bagipa manderangsa, department-ni aro jolo donggipa manderangni dakchakaniko man·e niamgri samni dokanrangko dakenga.
”Meghalaya-o name kamtangko sapgipa aro choligipa pharmacist-rang donga, indiba uamanga kamrangko ka·na am·on man·jaenga maina NHM-ni gita contract-o a·palni manderangna kamrangko on·enga. Iani a·sel atchikapgipa aro dongkamgipa manderang degree donggenchimoba, badingchiwale cha·na man·jaenga. Indiba a·paloni re·bagipa manderangsa tangkarangko man·e mane cha·prete roenga,” ine Islam aganangaha.
Indake, jako ra·e kamko ka·na man·gipa department-ko iani bidingo am·sandie, tole cha·enggipa manderangko dontongatchina, AMMSU didie aganangaha.
AMMSU, Garo Hills-ni a·kawe jolrango aro Assam-ni sima ari jolo donggipa manderangni bikotgipa organisation ong·a. Indake, iarangni bidingo sedoaniko, September 5 tarikon dakangaha.
Assam-oni re·bae niamgri samni dokanrangko dakenggipako, AMMSU jegalata
Date:
Share post:
