SHILLONG: Sorkarini kam ba project-rangko a·bachengna gita a·arangko man·a, Meghalaya a·doko namen nenga aro rakgipa kam ong·a, indiba ia changode a·dok sorkari a·arangko on·a gita gisik nanggipa a·a nokgiparangoniko, Greenfield ariport-ko rikna gita bang·a a·arangko nengraen man·aha.
India dingtang dingtang bakrango gitalgipa airport-rangni a·bachenganiko batanggimin salrango nikna gita man·enga. Indiba airport kragipa a·arangko maidake basena gita nanga?
Indake, da·o dipet green field airport-ko rikna gita sak 7-8 a·a nokgiparang a·dok sorkarina a·arangko palaha.
A·dok sorkarini airport-ko rikna gita on·gipa a·arangoni dal·batgipara, 5000 acres-ni a·a ong·a aro ua a·arang Mairang aro Ri Bhoi district nangchapa. Apsan daken, Mawrong-oba, 1000 acre-ni a·ako on·aha.
Apsan daken, Shnat Rait Tynring-oba 1400 acre-ni a·ako on·aha aro Madan Umwang-oba 3100 acre-ni a·ako on·aha. A·dok sorkarina, Lumrit songoba 2357 acre-ni a·arangko on·aha ari Diengpassoh-oba apsan daken 1000-oni 2000 acre a·ako on·aha.
National media-ni aganani gitade, terminal building-rang aro sildoreng bilona bildona dal·begipa a·arangko nanga aro uni kosako airport-ni ningao cha·chakani biap, dokan, dingtang dingtang bosturangko pal·gipa aro control tower-rang dongna gita nanga. Unbaksana parking aro office-rangna biaprang chu·ongna nanga baksa, airport-ko name rakkina aro chelchakna gita dal·gipa ka·penganirangko dakna nanga.
Unbaksa, airport-o ge 15 sildorengrang dongenchimode manderangko gatna gita taxi-rang bang·e donggen, uni gimin gari donchaknaba biaprangko nanggen.
Cochin International Airport-ni, Airport Director, ACK Nair-ni aganani gitade gesa terminal-ko chalaina gitan, 1,250 acre-ni a·ako nanga.
Koborrangko parakatani gitade, Greenfield airport-ko rikna gita a·dokni sorkarini search committee dingtang dingtang biaprangona re·ange a·arangko nianiko dakaha.
Batanggimi salrangoba, Greenfield airport-ko rikna gita sorkari a·arangko nangani gimin parakataha.
Indake, a·dok sorkari name am·sandianirangko dakani ja·mano, Airports Authority of India agipi officer-rang biaprangona re·ange porikka ra·e, a·dok sorkarina agan kupataniako on·anggen.
