SHILLONG: Ports, Shipping & Waerways aro Ayush-ni ma·mong minister aro Assam-ni gitcham chief minister Sarbananda Sonowal, Assam aro Meghalaya-ni gisepo sima arini bidingo soi ka·gipani bidingo janapatengon, sima ari jolo donggiparangni namnikjaenga inako kakket ong·ja ine jechakataha.
Sonibar salo Shillong-ona re·baaon Sonowal, kobor ra·timgiparangni Assam-Meghalaya sima ario soi ka·gipa MoU-ni gimin sing·on, “maming neng·nika dongja. Chinga apsan melie kam ka·enga’ ine aganchakaha.
‘Chinga apsan kam ka·an baksa, damsan a·songni ong·e melie-nangrime donggen. Ma·mong sorkari, India-ko bilakgipa ong·atna aro biltango pangchakgipa ong·atna kam ka·enga, ine Minister aganaha.
Assam-Meghalaya sima ario meligrikgijaniko namatgrikna damgni a·dokrangni meligrike soi ka·gipa MoU-ko opposition-rang namniktokjagenchimoba sorkari, ia mamlako nipiltaijawa ine aganaha aro mikkangchi gnigipa phase ba bako kam ka·aniko a·bachengataha ine aganaha.
Indake ong·engon Sonowal, “Meghalaya-ni manderang, Ayush Ministry-oniko bang·akon namgnirangko man·gen ine parakataha. Ayush, Meghalaya a·doko jakkalgipa traditional medicine ba samachikko jakkale sangiparangko namdapatna kam ka·gen ine agandapaha.
North East institute of Ayurveda, Meghalaya-o man·gipa ba jakkalgipa sam-bolrangni rokomrangko namdapatna nangenga ine Minister Sonowal aganangaha.
