SHILLONG: Meghalaya Assembly-ni gita nokko rikna gita contract-ko on·ani bidingo aro gital Assembly nokni protchong be·gruani bidingo inquiry dakna ge·etaniko on·china gita Robibar salo, Pynthorumkhrah-ni BJP MLA Alexander Laloo Hek, a·songni Prime Minister Narendra Modi-ko didiataha.
Iani bidingo a·songni Prime Minister-na chitti sedoatengon, Meghalaya Assembly-ni gital nokko rikna gita a·dok sorkarini skatang dake contract-ko on·ani bidingo sandirokchina ua a·songni Prime Minister-ko didiatenga ine a·dokni BJP MLA aro BJP central executive committee-ni membor AL Hek parakataha.
Hek-ni Prime Minister-na sedoatgipa chittio parakatani gitade, ia gital Assembly nokni protchong agre jreani a·sel aro ia protchongna bimangko salgipa aro ia nokko rikenggipa contractor-rangni gisepo maming agangrikanirang dongjani a·selsa New Shillong Township-ni Mawdiangdiang-o rikenggipa gital Assembly building-ni protchong, re·anggipa May jani 22 tariko be·gruaha ine iani bidingo am·sandigipa Indian Institute of Technology-Guwahati (IIT-Guwahati)-ba parakahachim.
“Ia gital Assembly nokni protchong be·gruanichi a·dokna kratcha·na nanganiko ra·baahani gimin ia Meghalaya Assembly-ni gital nokko rikna gita contract-ko on·ani bidingo sandirokatchina anga nang·ko mol·molatenga,” ine BJP MLA, Prime Minister Modi-na sedoatgipa chittio parakataha.
Hek-ni parakatani gitade, ia gital Assembly nokko rikna gita contract-na dakkiani somoio Assam-ni Badri Rai Company Limited-de jegalako man·ahachim indiba ja·mano contract-ko Uttar Pradesh a·dokni Rajkiya Nirman Nigam Limited-na on·ani ja·man ia company, Assam-ni Badri Rai Company Limited-nan sub-contract-ko on·skaahachim.
