SHILLONG: Meghalaya a·doko joltangni political dolrang bang·ahani a·selsa joltangni political dolrang bilakna man·jaenga ine Hill State People’s Democratic Party (HSPDP)-ni MLA Renikton Lyngdoh Tongkhar talatangenba, joltangni bilakgipa dolkosa a·dokni manderang nikna siktokenga ine parakataha.
“A·dokni manderang joltangni bilakgipa dol ge·sakosan nikna gita siktokenga aro ia dolko anga re·baenggipa 2023 bilsini election-o chu·sokgipa ong·atna nangnikenga,” ine Tongkhar aganaha.
Batanggimin somoirangona bate United Democratic Party (UDP) dol chu·sokgipa ong·batengaha aro 2023 bilsioba ia dol dal·roroangkugen ineba ua aganaha.
UDP-o napna miksonganirang dongama ine sing·on, ua iani gimin parakna jechakskaaha.
“Anga je dolo napgenchimoba somoi ong·ahaon jinmana parakaigen indiba jatnasa kam ka·asa skanggipa ong·a aro political party-de gnigipasa ong·aia,” ine Tongkhar aganaha.
Tongkhar-ni parakatani gitade, 2018 bilsini election-o HSPDP aro UDP dolrang una dakchakanirangko on·ani a·selsa ua chu·sokgipa ong·ahachim.
“Dolgninan anga name kamrangko ka·e on·aha. HSPDP-na anga an·tangni bil ama gita dangdike on·aha aro UDP-naba MP election-ko man·chape pilak by-election-rangon bilakbee campaign-rangko ka·e on·aha. Anga darangkoba watgala dongjaha,” ine HSPDP-ni MLA aganaha.
