SHILLONG: Jowai district jail-oni joke katgipa sakdok koidirangoni sakbriko Robibar attamchibara, West Jaintia Hills a·jao donggipa Shangpung songni manderang jinma so·ote galaha.
Koborko on·ani gitade, Robibar attamni 3:00 bajimango, koidirangoni saksa cha·ani brena gita cha dokkan ge·saona re·angon, ia koidiko mitam manderang ma·sienba songni manderangna u·iataha. Ia koidini gimin koborko man·soahaon songni manderang jinma re·bae, koidirangko rikna a·bachengaha aro ia koidirang, sambao donggipa buringchipakna kate chakahachim.
Indake ong·genchimoba, ia koidirangko songni manderang jinma rim·na gita man·aha aro uamangko gol·dikrangchi dokna a·bachengtokaha.
Jinma chadrapako man·e ia koidirangoni sakbride ua biapon siaha indiba saksade joke katna man·aha ine kobor on·timgiparang parakataha.
Manderangni dokgrikmako man·e sianggipa koidirangoni saksade, re·anggipa August jao tourist taxi driver sakgni, chong·motan Damehipaia Papeng aro Fullmoon Kharsahnoh-ko so·otanina rim·ako man·gipa I Love You Talang ong·achim.
Ia a·sel ong·ani somoio, jail-oni joke katgipa dokgipa koidikode songni manderang nikskajaha ine kobor on·timgiparang u·iataha.
Re·anggipa Sonibar salo, sakdok koidirang, Jowai district jail-o kam ka·enggipa sipairangko chadrapenba, jail-oni joke katna gita man·ahachim aro joke katgipa koidirangara I Love You Talang baksana Marsanki Tariang, Rikamenlang Lamare, Shidorki Dkhar, Lodestar Tang aro Ramesh Dkhar ong·achim.
Manderangni chadrapanio Ramesh Dkhar minggipa koidide buringchi kate jokna man·aha ine kobor on·aha.
