SHILLONG: Meghalaya a·doko Casino aro uandakgipa dingtang dingtang joa kal·aniko niamo ong·atna sorkarini manchianiko dingtang dingtang dolrang aro a·doko songdongenggipa manderang jegaltokengoba, a·doko Casino-rangko chalaina licence-rangko on·na sorkari tik ka·angaha aro uandaken da·o dipet licence-na dorgasto galgipa sakgittam manderangnade sorkari, temporary licence-rangko on·manaha ine u·iataha.
Iani bidingo Assembly-o Umroi-ni MLA George Lyngdoh-ni sing·anina aganchakaniko on·angengon, bang·a manderangan licence-na dorgastorangko galaha aro ianoni sakgittam manderangna temporary licence-rangko on·manaha ine a·dokni Taxation Minister James K Sangma parakataha.
Salgro salaram jolni gipin a·dokrangde Tourism sector-o susagrikaniko on·na a·bachengahani gimin Meghalaya a·dokoba tourist-rangko salbae a·dokna man·dapanirangko ra·bana gita casino-rangko kulina nangengaha ineba Taxation Minister parakataha.
Meghalaya a·doko songdongenggipa manderangna janggi tangani cholrangko on·e a·dokni GDP-ko tang·doatna gita sorkari, a·doko tourism-ko tang·doatna gisiko nange kam ka·enga ineba Sangma parakataha.
Meghalaya a·doko skangonin dingtang dingtang dakgipa joa kal·anirang dongachim ine janapatengon, ia joa kal·chakgipa biaprangko niamo ong·atna gitasa sorkari, ia Act-ko ra·gatenga ineba Minister parakataha.
Sangma-ni parakatani gitade, Meghalaya Regulation of Gaming Acts & Rule 2021-ko ra·gatengon, a·doktangni manderangko bar (chu ringchakani biap)-rango napna on·na gitaba sorkari dingtangmancha niamrangko tariskaenga.