SHILLONG: Re·anggipa Sonibar salo, Jowai district jail-oni koidi sakdok joke katna man·ahani gimin magisterial aro independent inquiry-ko dakchina gita a·dok sorkari ge·etaniko on·aha ine Sombar salo, a·dokni Home Minister Lahkmen Rymbui parakataha.
Home Minister-ni parakatani gitade, Jowai district jail-oni sakdok koidirang joke katgipani bidingo magisterial inquiry-ko dakchina West Jaintia Hills a·jani District Magistrate, Additional District Magistrate PK Boro-na ge·etaniko on·manaha aro maini a·sel ia koidirang, Jowai district jail-oni joke katna man·ahachim, iani bidingo jakgitelgipa inquiry-ko dakchina West Jaintia Hills a·jani Additional Superintendent of Police (ASP)-na ge·etaniko on·atskaaha.
Jowai jail-oni joke katani ja·man sakbri koidirangni sianggipani bidingo inquiry-ko dakna gita Additional District Magistrate MA Challam-ko donatskaaha ineba Home Minister parakataha.
Iani bidingo Assembly-ni Autumn Session-o talataniko on·angengon, Jowai district jail-oni joke katgipa sakdok koidirangoni sakbriko Robibar salo, West Jaintia Hills a·jani Shangpung jolo, songni manderang ka·a ding·chaoe chadrapahani gimin iani bidingoba inquiry dakchina sorkari ge·etaniko on·angaha ine Home Minister parakataha.
“Ia koidirangko chadrapani bidingo koborko man·soa bakan dolsa police-rang, a·sel ong·chakgipa biapona re·angahachim indiba police-rangko, manderang jinma champengsoenba, ia sakbri koidirangko chadrapaha. Manderangni jinma chadrapanio police-rangoniba bang·en saknaanirangko man·aha indiba ja·mano chadrapa man·gipa sakbri koidirangko magistrate-ni permission gnang, civil hospital-ona ra·angna man·ahachim,” ine Rymbui janapatenba, hospital-ona sokangon, ia koidirangko siakosa ra·baaha ine doctor-rang parakataha ine talataniko on·angaha.
Manderangni jinma chadrapako man·e sianggipa sakbri koidirangara, Moorap songni I Love You Talang, Mootyrshiah songni Lodestar Tang, Thangrain songni Shidorki Dkhar aro Priang songni Marsanki Tariang ong·achim aro ia sakbri koidirangni manggisiko Ialong civil hospital-ni manggisi donchakgipa biapo donengkua ine ua Rymbui parakataha.
Indake ong·engon, Jowai-o donggipa District Prison & Correctional Services-oni sakdok koidirang joke katani ja·man, ia jail-o kam ka·enggipa sakbonga manderang, chong·motan head warden Rajesh Swer, warder Champmilan Kynjing, temporary warder Damelahun Sun, warder Pyndaphor Bamaon aro temporary warder Alexier Lawtam-ni kosako criminal case-ko segataha ineba Assembly-o Home Minister parakataha.