SHILLONG: Mijal state assembly-ni autumn session-ni gittamgipa salni tom·anio A·doko education sector-ni a·bao ja·manchakengani gimin chanchianian house-ko ganggopaha, jeon chanchirimanio bakko ra·gipa legislatorrang gimikan suk ong·gijani aro jajrenganirangko paraktokaha aro education system-ko nipilna nangnikaniko parakangtokaha.
Skanggipao, a·doko skul skigiparangni changrongna nanggipa neng·nikanirangko agan-janapangaha, jemangan an·tangtangni man·gni dormahana, dormaha bariatchina, songadamni skulrangko namdapatchina, unagreba dingtang dingtang uamangni neng·nikanirangna ramaona ong·kate dabianiko dakna draatako man·pilaha ine Umroi MLA George B Lyngdoh aganaha.
Education sector-ko namatjaengani a·selan re·anggipa adita jarangna skango a·songo education sector-rangko nirokgipa agency-rangni koborko parakatanio a·song gimikni gisepo Meghalaya, ka·mabatgipao ga·akaha ineba Lyngdoh aganaha.
Unigisepon education sector-o maimancha neng·nikanirang dongenga uarang pilakkon nipilna nangao ga·akenga, Lyngdoh aganaha.
Mawsynram constituency-ni TMC MLA, HM Shangpliang agana je skigiparang changni chang ramaona ong·kate jingjengataniko dakenga, NGO-rangna batpilen uamangsa jeingjengataniko dakenga.
“Classroom-rangona re·angana bate skigiparangni ramaona ong·kate jingjengatanikosa an·ching bang·bate nikna man·enga. Skigiparangni jingjengatanio chatro chatrirangni chakpaanirangkoba an·ching nikenga, jedake Pine mount school-o, ian namen rasong griani ong·chongmota, education system-o maimancha ong·enga? Ia neng·nikanirangara saomancha daito ong·enga?” Shangpliang sing·doangaha.
Kobor segiparangni report-o gitade, lekka porani a·bao bilsiantin kror 2000 tangkarangko koros ka·gen ine Chief Minister re·anggipa December 2021 bilsio ku·jokahachim, “Ia tangkarangkosa on·atahama, anga education minister-oniko knana nangnikenga, chamataha ong·ode, ia tangkarangchi education department-ara maiko dakjok,” ua aganaha.
Education system-ni kamrangko cabinet-sa nipilna nanga, Chief Minister ba Education Minister mangmangchi ong·ja ine Shangpliang ku·pattiaha.
A·dokni education system-o bang·akon nipilna aro namdapatna nangenga ine aganengon, Rangsakona constituency-ni TMC MLA, Zenith Sangma indake aganaha je skangode skul skigiparangni ramaona ong·katpile uamangni dabianiko nikkujachim.
Free aro compulsory education ingipara baosa ine sing·an baksa ian nirokatna nangchongmotenggipa obosta ong·engaha ineba Pa Sangma aganaha.
Siju Rongara MLA Rakkam A Sangma agana je education-ni a·bao sakantian daito ra·tokna nanga.
“Batanggimin bilsi 50-ni giseponiko niate nibo, badita sak IAS aro IPS, doctor-rang, engineer-rang aro scientist-rang an·chingni a·doko ong·kataha? Chanate nion ian an·chingni ka·dongsoa gita ong·ja ine nikgen. Ian sorkarinisan daito ong·ja an·ching sakantiba prakripe gatrimna nanggen, jedakode an·chingni dedrang knalo mande ong·gen,” Rakkam Sangma aganaha.
Uamangna agreba Gambagre MLA, Saleng A Sangma, Selsella-ni NPP MLA, Ferlin CA Sangma aro gipin legislatorrangba education system-ko nipile namdapatna nangnikaniko aganatokangaha.
