SHILLONG: Re·anggipa Sonibar salo, Jowai district jail-oni joke katgipa sakdok koidirangoni bon·kamgipako Mongolbar salo, songni manderang, Hynniewtrep Integrated Territorial Organisation (HITO)-ni membor-rang baksa police-rangna rim·e on·aha.
Koborko on·ani gitade, Jowai pattokoni joke katgipa koidirangoni saksa Rikmenlang Lamare minggipa mandeko, Mongolbar pring 11:00 bajimango Barato songni Village Defence Party (VDP), HITO Barato unit-ni membor-rang baksa nangrime rim·na man·aha aro ja·mano uko West Khasi Hills a·jani police-rangna pakwate on·ataha.
Jowai jail-oni joke katgipa sakdok koidirangoni sakbrikode Robibar salo, Shangpung Thadmuthlong songo, ka·a ding·chaoenggipa manderang, jinma chadrapenba so·ote galahachim aro ia a·sel ong·anio joke katna man·gipa koidi Ramesh Dkhar-koba police-rang, Sombar salo rim·pilahachim.
Jowai pattokoni joke katgipa koidirangoni saksade Barato jolo dongnue dongenga ine koborko man·soani ja·man songo VDP-ko dilenggipa manderang, HITO dolni membor-rang baksa sandina a·bachengataha aro uandaken Mongolbar salo uko rim·e police-rangna pakwate on·ataha.
Jowai district jail-o donako man·enggipa sakdok koidirang joke katna man·ahani gimin ia jail-o kam ka·enggipa sakbonga manderangko police-rang rim·aha.
Police official-rangni parakatani gitade, rim·ako man·gipa Jowai jail-ni manderang, ia sakdok koidirang baksa chalakki dakesa ia sakdok koidirang, pattokoni joke katna man·ahachim.
