SHILLONG: Assam aro Meghalaya a·dokni simarango ru·utbea bilsirangna ong·enggipa golmalrangko namatna gita skanggipa bako soi ka·grikgimin Memorandum of Understanding (MoU)-ko nipiltaina nangani dongjaha ine Budbar salo, a·dokni Chief Minister Conrad K Sangma, Assembly-o gisik ra·atpiltaianiko on·angaha.
Assam a·doko man·anggipa mitam songrangko man·bapilna gita a·dok damgnini soi ka·grikgipa MoU-ko nipiltaiani cholrang donggenma ine Nongpoh-ni MLA Mayralborn Syiem-ni sing·anina aganchakengon, a·dok damgnini gisepo meligrikna man·jaenggipa dam 12 biaprangoni skanggipa bako damdok biaprangko namatchengna ja·ku de·anio a·dok sorkari, chang 28 tom·anirangko ong·ate, chang 18-na kingking, ia songrangonaba re·ange songni manderang baksa agangrikaha aro salantian changbrimangna tom·anirangko ong·atahani gimin da·o ia MoU-ko nipilna nangani katta dongjaha ine Chief Minister parakataha.
“Skanggipa bako a·dok damgnini soi ka·grikgipa MoU-ko nipiltaina nangani katta dongjaha aro meligrikna man·jaenggipa bang·bata songrangkon Meghalaya a·dokona man·baaha,” ine Chief Minister aganaha.
Assam-o napanggipa songrangko man·bapilna jotton ka·genma ine MLA-ni sing·anina aganchakaniko on·angskaengon, ia songrangko songo donggipa manderangni nangnikani gitasa Assam-o napataha ine Chief Minister parakataha.
Ia songrangko ‘watchanggala’ ine MLA-ni agananiko jegalatengon, “Ia ‘watchanggala’ ine agangipa songrangni gimin name chanchirimna nangenga maina ia songrangara a·dok damgnini gisepo meligrikna man·jaenggipa biaprangoni bak ong·jagenchimode aro Assam a·dokchipaknisa ong·e 2011 bilsio salgipa wa·reng gita ong·jagenchimode ia songrangko ‘watchanggala’ ine mingna man·jawa ine Chief Minister parakataha.
Chief Minister-ni parakatani gitade, a·dok damgnini gisepo meligrikna man·jaenggipa biaprangoni damdok biaprangko namatchengna kam ka·anio sorkari, regional committee-rangni ku·pattianirangosa pangchake ja·kuko de·ahachim.
Assam aro Meghalaya a·dokni simarango meligrikna man·jaenggipa bangki biaprangko namatna kam ka·anio 2011 bilsio Meghalaya sorkarini Assam a·dokna on·atgipa report-ko ra·gija dingtang bewalo kamko ka·skana man·genma ine MLA-ni sing·anina aganchakaniko on·angengon, “Ia somoio iandake dal·begipa dingtangataniko jako ra·aniara chingna rakbea kam ong·gen indiba jerangon chol ong·a chinga chanchirime kamko ka·gen. Indiba 2011 bilsini report-ko galchange kam ka·anide namen rakbea kam ong·gen,” ine Sangma aganaha.
Iana skang, a·dok damgnini soi ka·grikgipa MoU-ko ra·e North Shillong-ni MLA Adelbert Nongrum baksa a·dokni Chief Minister Conrad Sangma aro Deputy Chief Minister Prestone Tynsong-ni, adita ding·chaogrikanikoba Assembly-o nikna gita man·aha.
MoU-o Assam sorkari baksa soi ka·ani gimin matnange, ka·dongode ia MoU-ko nipilchina ine North Shillong-ni MLA Adelbert Nongrum, Chief Minister-ko ra·biangahachim.
MLA-ni ra·bianiko Chief Minister ra·chakenba, lekkaniko nigija a·dok damgnini gisepo meligrikna man·jaenggipa dam 12 songrangko mingchina aro ia meligrikna man·jaenggipa biaprangona ua badita chang re·angaha, uko talatchina ra·biskaaha.
Chief Minister-ni iandakgipa kattarangko aganon, KHNAM dolni MLA, ka·a ding·chaoe, ian Chief Minister-ni kamsa ong·a aro ua iako dakna nangani katta dongja ine aganchakskaaha.
A·dokni Deputy Chief Minister Prestone Tynsong-ba bakan chakate, Chief Minister-ni agangipa kattarangna chakpaaniko on·aha aro North Shillong-ni MLA-ko iandake ka·o nange mesokjachina aro nangakosa sing·china aganaha.
Adita somoirangna iandake ding·chaogrike jegrikani ja·man, Assembly-ni Speaker, membor sakgittamkon jrip dongatpilna man·aha aro Chief Minister-ko MLA-ni sing·anirangna aganchakchina aganskaaha.
