SHILLONG: Meghalaya a·dok gimiko dam 36 lower primary (LP) skulrang skigipa gri ong·enga ine Bristibar salo, a·dokni Education Minister Lahkmen Rymbui parakataha.
Assembly-o Rangsakona-ni MLA Zenith Sangma-ni sing·anina aganchakaniko on·angengon, skigiparang mitamde kamoni neng·takaha, mitamde gipin biapona transfer ra·angaha aro mitamde kamtangtangko watahani a·selsa ia skulrango skigiparang dongjaenga ine Education Minister, talataniko on·angaha.
“Ia skulrango skigiparangko rakkina chinga ra·chakahani gimin, je skulrangon skigiparang dongjachim, uandakgipa skulrangna skigiparangko rakkina gita chinga Mawkyrwat, Mawshynrut, Mairang, Nongpoh, Baghmara, Resubelpara aro dingtang dingtang a·jani SDSEO-rangna permission-ko on·ataha,” ine Rymbui aganaha.
Skulrango skigiparang dongjae chatro chatrirang neng·nikanirangko man·na nangtokengani gimin an·tangni suk ong·gijaniko parakatengon, ia skulrango chatro chatrirangna dontonggija lekka porako on·na man·na gita skigiparangko contract basis-o rakkiskachina Rangsakona MLA didiangaha.
“Skigiparangko rakkichina ge·etanide mikkangchi ong·gnikosa mesokani ong·enga. Uni gimin bi·sarangna dontonggija lekka porako on·na man·na gita ta·raken skigiparangko rakkichina anga nangnikenga,” ine Zenith aganaha.
Iana aganchakaniko on·angskaengon, Meghalaya High Court-ni gital ge·etaniko on·ani ja·man Education department, roster system-ko tarina nangaha aro uandaken batanggimin changoba skigiparangko ra·ani somoio neng·nikanirangko chagrongna nangaha ine Education Minister parakataha.
“Skigipa gri ong·e dongenggipa skulrangna chinga ta·raken skigiparangko rakkina ka·dongenga. Temporary teacher-rangko rakkina gitaba chinga niamrangko nienga,” ine Rymbui aganaha.
Indake ong·engon, a·dokni dam 15 higher secondary skulrango full fledged principal-rangko songe on·kujaengani gimin North Shillong-ni MLA Adelbert Nongrum, suk ong·gijaniko parakatskaaha.
