Wednesday, February 21, 2024

Baringre Nengsil songni sorkari skulo ru·uta bilsirangonin skigipako dongjaenga

Date:

Share post:

spot_img

Rongjeng: Baringre Nengsil aro Gabil Nengtek song damgni gesa sorkarini skulrango apsan ka·rima, indiba poraia skianiko man·a gita uamang jumang nikna mangba chela maina songo donggipa sak 65 poraigipa chatro chatrirang maming dakeba darangonikoba skie on·anirangko man·a gita amja.
Gisiko namen chanchiani sokbaanide, song damgnina on·gipa skul bilsi 7-rangna kam ka·jagenchimoba aro teacher dongjagenchimba skigipa aro skie ra·gipa bi·sarangna gitalgipa nokko kutturi sni baksa batanggimin salrango rike on·aha.
Baringre Nengsil-ona, Rangbang-o rama donggipaoni km 3-rang re·na nanga aro mangsonggipa songjima Rongjengoni kam 10 mang chela.
Songona ramarangko name man·kujaenga aro ramako songrena tarina gita job card donggiparang tarina gitasienga. Indake mikka wachi kariode ja·samgnigipa gari aro 4WD truck-rang namen namjabegipa ramako re·na man·aia.
Rama namjaani a·sel apsan dakgipa obostakon, Rangbango donggipa skul gesaona, km 6 mang chelako re·bagipa chatro chatrirangba cha·grongna gita nanga. Gipin manderangnade a·gilsakni senganirangko skie ra·anide jumangsan ong·aia.
Songo donggipa manderang sak 400 mang donga aro nok te 55 mang donga. Baringre Nengsil song, Rongjeng constituency aro Rongjeng C&RD Block-ni ningo ga·aka.
Songo donggipa skul president-ni aganani gitade, ru·uta bilsirangonin uamangni skulna skigipako man·jaenga aro darangna mandeba uamangna skie on·anirangko dakjaenga.
Indake songo donggipa manderangni skigipako on·china aganani ja·mano, batanggimin bilsi gnina skang sakgni contractual teacher-rangko uamangna on·aha. Indiba a·doko contractual teacher-rangko bon·atani ja·mano uamangni kamba bon·chongdikna gita nangaiaha. Ua salrangoni songo noko donggipa bi·sarang mamingkoba dakgija romikbrange rotokaiaha.
Songni manderangni aganani gitade iarangni bidingo, district education authority-rangna aro DI-na agane janape on·aniko dakaha. Jolni MLA-ba skigipa on·gen ine ku·rachakaniko dakahachim.
”Chingni songni dongama dongja ukon, DI masija. Ru·uta salrangoni chingna skigipako on·china biko aganengaha, indiba ua kam angni jako ong·ja inesa ua aganchakaia. Apsan dakgipa kattarangko chingni gronggipa gimikan aganaia,” ine Skul-ni President, Jonasen M Sangma aganangaha.
Namen knatogijagipa aro ra·chakna man·gijanide, skie on·gipa dongjaoba batanggimin salrango gitalgipa skul nokrango, songni manderangko ka·dingsteke rona ama gita rike on·aha. Koborrangko man·soani gitade gitalgipa skul noko, East Garo Hills District Rural Development Agency (DRDA)-ni gita rikaha.
Social activist Tuesbrial Marak-nia aganani gitade ian ka·dinge rona nanggipa obosta ong·ja, maina ia obostachin skia poraianiko batditana a·dok sorkari gamchate ra·enga uko mesoka. Uni aganani gitade, department-ni manderang an·tangtangni kamko name ka·genchimode skulo sak 100 batpile poraigiparang donggenchim.
Baringre Nengsil Goverment LP School, a·dok sorkarini aro Education department-ni jako ra·e kam ka·na nanggipa ong·a. Indiba bang·a skulrango gitan, apsan daken ia skuloba galchipe donenga aro namatna gita kam ka·jaenga.

spot_img

Related articles

Free medical camps by BSF benefit locals

SHILLONG, Feb 20: The ‘Seema Praharis’ of BSF Meghalaya, as part of their continuous efforts to safeguard the...

AHAM broaches issue of Adokgre’s C&RD Block

Tura, Feb 20: The Achik Holistic Awakening Movement (AHAM), Adokgre region unit in North Garo Hills (NGH) has...

VPP — Where is the party heading?

Editor, The ongoing Assembly session and issues of the recent past, have now warranted to try and question the...

Bob’s Banter

By Robert Clements Just Plain Coffee Thoughts..! Was wondering whether to write on politics or plain humour, when I found...