Pala, MDA sorkariko Gaming Act-ni gimin matnanga

SHILLONG: Lok Sabha-ni MP aro state Congress Chief, Vincent H Pala, a·dok sorkariko Meghalaya Regulation Gaming Act and Rules, 2021-ko bon·atna chu·sokjaode, MDA-o bakrimgipa dilgiparang gimikan ramaosa ong·gnok aro jinma manderang ba public-sa Assembly-o ong·skagnok ine aganaha.
Chief Minister Conrad K Sangma, Meghalaya Regulation Gaming Act and Rules, 2021-ni gimin parakatani ja·man Congress dilgipa ia kattarangko aganaha.
Church ba giljani dilgiparang ia act-ni kosako jegaltokaniko janapate, Pala, indinea ganaha, “ia regulation-ko sorkari ra·galna nanggen ong·jaode bakrime rikgipa sorkarini dilgiparang ramao ong·gen aro public-rangsa assembly-o ong·skagnok.”
“Bang·a society church aro organisation-rang iako namniktokjaenga. Sorkari, iako ta·raken pass ka·na gita nangnikenga aro chief minister an·tangan an·tangko gambling committee-ni dilgipa ine rasong chae aganenga.”
Ian bang·bate tourist-rangko salbana man·gen ine agangipa kattarangko Pala, jegalaha.
Uandake iara mingsa gita a·dokna revenue ba kajinako bariatna ja·ku de·ani ong·ama ine sing·on, “revenue generation ba kajinako chimongna gita dingtang dingtang cholrang jekai- koela, rong·chun ba uandakgiparang donga indiba iarangara mitam manderangni pocket-onasa sokaia” ine aganchakaha.
“A·doko man·gipa gam-jinrangoniko kajinakon man·jaenga ong·ode, gambling-oniko maidake man·gen? ine sing·ataha.
Bilsi 2023 Assembly poll-na iako political agenda tariani giminba, “ian skanggipa changna a·dokni manderang jegalenga ine ong·ja, skangonin jegalbaenga. Churangko bangbang bajar-antio palenga aro baditan license-rangko on·taitaienga, jeni a·sel a·dokni chadamberangni gisepo chu jakkalaniko bang·en nikna man·enga. Iarangna agreba sorkari baksa rehabilatation centre-rangba dongja, ine Congress dilgipa aganaha.
Minggipin drug ba pekgipa ringanirangko jakkalani batrikrikenga, jeni a·sel a·dokni manderang neng·nikako man·tokenga, indiba sorkarini rehabilitation centre-an dongja. Iarangni a·sel ma·a-paarang, songsalni manderang baditan neng·nikarangko man·enga, iani gimin sorkari chanchija, an·tangtangni pocket-ko gapatnasan chanchitoka, ine Congress dilgipa matnangaha.