SHILLONG: Meghalaya a·dokni dingtang dingtang biaprango songdongenggipa manderang aro dingtang dingtang dolrang jegaltokengoba, ia bilsio Cherry Blossom Festival-ko ong·attaina gita a·dok sorkarini tik ka·soengani gimin Voice of the People’s Party (VPP) sing·doataha.
VPP-ni president Ardent Miller Basaiawmoit-ni parakatani gitade, ia Cherry Blossom Festival-ara a·dokni darang jat aro daka rikanio nangchakegipa maniani ba festival ong·jachim aro ian songsalna ong·signigipa kamrangkosa ra·baani gita ong·aiachim.
“Songbadrango seani gita ia festival-ko ong·atna a·dok sorkari, tangka paisarangko ra·srona nangenga ong·ode ia maniani ba festival-ko a·dokni manderang jegalna gita bil donga,” ine Basaiawmoit parakataha.
Meghalaya sorkari indinan gro nanggipa ong·engahani gimin da·o tangka paisarangko ra·srodapna nanggenchimode ian a·dokna neng·nikanikosa ra·badapani gita ong·aigen ineba VPP-ni president parakataha.
A·dokna aro a·doko songdongenggipa manderangni namgnina iandakgipa festival-rangko ong·ate tangka paisarangko indin koros ka·e rojachina gitaba ua a·dok sorkariko didiataha.
A·doko joa kal·anirangko niamo ong·atna gita a·dok sorkarini miksongengani giminba ua a·dok sorkarini kosako raken jegalaniko parakataha.
“A·doko songdongenggipa manderangni namnikgijaniko nikeba ia sorkari, a·doko Casino-rangko kulina ia sorkari miksongenga. Autumn Session-ni somoio Meghalaya Regulation of Gaming Act 2021-ko a·dok sorkarini ra·galpilna jegalanian a·doko joa kal·aniko niamo ong·atna sorkarini miksonganiko mesokani ong·enga,” ine Basaiawmoit parakataha.
A·doko casino-rangko kulina on·jawaha ine chief minister-ni Assembly-o parakataniara, manderangko aro mongsongbate Mondolini dilgiparangko ka·sinatna chalakki dakaniko mesokani gitasan ong·aia ineba ua parakataha.
