SHILLONG: Assam aro Meghalaya a·dokni simarango meligrikna man·jaenggipa biaprangoni gnigipa bakko namatna gita jasamangna skangan a·dok damgnini chief minister-rang agangrikaniko dakna a·bachengatahaoba da·onan kamrangko ka·dilnagipa regional committee-rangko songani bidingo a·dok damgnionin maming kattarang dongkujaenga.
Ia gnigipa bakna a·dok damgnini chief minister-rang skanggipa changna re·anggipa August 21 tariko grongtaiani somoio, sal 15-ni gisepon a·dok damgnini regional committee-rangko songgen ine tik ka·angahachim.
Indake ong·engon, gnigipa bakni kamrangko ka·dilnagipa regional committee-rangko songani bidingo da·onan maming u·iatanirang dongkujaenga ine Meghalaya a·dokni Cabinet Minister aro skanggipa bako West Khasi Hills regional committee-ni chairman ong·e kamko ka·dilanggipa Renikton Lyngdoh Tongkhar, Sombar salo parakataha.
“Somoide da·o re·angroroengaha aro chinga West Khasi Hills a·jani gita skanggipa bako namgnirangko man·ahani gimin da·o gnigipa bakoba namgnirangko man·na ka·dongsoengachim,” ine Tongkhar aganaha.
Da·o gnigipa changna a·dok damgnini agangrikanio dingtang dake ja·ku de·anirang donggenma ine sing·on, simarango songdongenggipa manderangni nangnikaniko ra·anian mongsonggipa daito ong·na nanggen ine Tongkhar parakataha.
“Ia biaprango songdongenggipa manderangni kusi ong·anikosa chinga nikna sikenga,” ine ua aganaha.
Indita bilsirangna namatna man·jaenggipa neng·nikaniko MDA sorkari namatna ja·kuko de·dilaha ine janapatengon, a·dok damgnini gisepo meligrikgijaniko namatna maming nambatgipa cholrang dongjawa aro MDA sorkarini kamrangko ka·anio maming dakgualani dongja ine Tongkhar parakataha.
Skanggipa bako a·dok damgnini soi ka·grikgipa MoU-o bang·a songni manderangan jegaltokkuengachim ine nikna man·a.
Ia gnigipa bako a·dok damgnini chief minister-rangan, mongsonggipa biaprang, jekai Block I, Block II aro uandakgipa biaprangona re·ange niena miksongengachim ineba nikna man·a.
Ia gnigipa bako man·chapenggipa biaprangara, Psiar, Khanduli, Block I, Block II, Bardua, Mawtawar aro Langpih jolrang ong·skaengachim aro ia biaprangko namatna dolgni agangrikanio Karbi Anglong Autonomous Council (KAAC)-ni dilgiparangba bak ong·na siengachim.
