SHILLONG: Meghalaya Police-ni dingtang dingtang kamrangna porikkarangko ong·atanio da·onan result-rangko parakkujaengani gimin Sombar salo, police-ni kamna porikka segipa candidate-rang, Shillong songjinmani MBOSE office sambao asonge jingjengatanirangko dakangaha.
Jingjengatenggipa candidate-rangni parakatani gitade, Meghalaya Police-ni kamrangna uamang 2019 bilsionin dorgastorangko galahachim aro Physical Efficiency Test-ko 2021 bilsini November jao ra·e, written test ba porikkako ia bilsini February jaon ra·ahaoba da·onan iani result-rangko parakkujaengachim.
Ia kamna porikkako segipa sak 3000-mangni gita candidate-rang, an·tangtangni result-rangna senge dongtokenga ine janapatengon, result-rangko parakani tarikrangko uamangna u·iatskachina candidate-rang, sorkariko didiataha.
“Maini gimin porikkani result-rangko da·o jasni batpilahaoba parakna man·kujaenga? Chinga porikkao chu·sokgenoba chu·sokjagenchimode an·tangtangni result-rangko ma·sie ra·na bil donga. Iandake chinga kamgri ong·e dongenggipa chadamberangko kal·ake roaniko chinga nikna sikjaesa da·alo asonge jingjengataniko dakna draatako man·aha,” ine jingjengatenggipa candidate-rang parakataha.