SHILLONG: Re·baenggipa 2023 bilsini Assembly election-na skangan, Meghalaya a·doko Inner Line Permit (ILP)-ko ra·gatani bidingo parakatnaba gnang ine Mongolbar salo a·dokni BJP dol, maming ma·sisamsoani gri parakataha.
“Ian ong·naba gnang, ong·janaba gnang chingaba name ma·sija indiba da·o a·doko ILP-ko ra·gatani niamrangko ma·mong sorkari niengkua,” ine BJP-ni state president Ernest Mawrie parakataha.
Election-na skang Meghalaya a·doko ILP-ko ra·gatani bidingo ma·mong sorkari aro BJP parakatenba, manderangni nangnikanirangko chu·sokatgenma ine sing·anina ua ia kattarangko aganaha.
“Da·o jabongamangni gita somoirang dongkuengani gimin chinga name aganna man·kujawa,” ineba ua aganskaaha.
Meghalaya a·doko ILP-ko ra·gatchina dabienggipani bidingo BJP dol pangnan ma·mong sorkari baksa agangrikenga aro a·dokona ma·mongni dilgiparang re·baa changantian ILP-ko ra·gatchina dabienggipani giminsa agangrikrongenga ineba Mawrie parakataha.
“Da·o dipet ian MHA-ni ning·osa ong·engkua aro uamangsa nangani kri ja·kuko de·anggen. A·doko ILP-ko ra·gatgenchimode ian a·dokni manderangna namgni ong·gen,” ine ua aganaha.
Bengal Eastern Frontier Regulation Act 1873-ni ning·o Inner Line Permit-ko Meghalaya a·dokoba ra·gatchina dabiani da·o bilsi 40-mang ong·pilengahachim aro da·o re·baenggipa 2023 bilsion Assembly election-ko ong·attaina siengahani gimin ILP-na dabiani kattarang nakatbataiengahachim ine nikna man·a.
