Anganwadirangni dormahako gong 10,000-ona bariatchina dabia

TURA: Manderangni namgnina dingtang dingtang kamrangko neng·bee ka·engoba Anganwadi worker-rangna dormahako komienga on·engani gimin dormahako komibeoba gong 10,000/-ona bariatchina gita All Garo Hills Anganwadi Workers & Helpers Association (AGHAWHA) dabiangaha.

Iani bidingo association-ni dilgiparang, West Garo Hills a·jani Deputy Commissioner-ko Budbar salo grongenba, uni jako a·dokni Chief Minister Conrad Sangma-na memorandum-ko on·ataha ine AGHAWHA-ni secretary MD Shira parakataha.

Shira-ni parakatani gitade, Anganwadi worker-rang, an·tangtangni kamrangna agreba dingtang dingtang sorkarini program-rang, jekai Polio, TB-na survey ka·ani aro uandakgipa kamrangkoba ka·na nange boja ong·engoba da·onan Anganwadi worker-rangna ma·mongoni gong 4500-ko aro a·dok sorkarioni gong 1500-ko on·e gimik gong 6000/-kosan honorarium dake man·tokpaenga.

“Kamrangko ka·anina chingnaba apsan dormahakon on·na nanga maina Polio-ni kamko ka·anio ASHA worker-rangnade gong 100/- ka·e on·na indiba Anganwadi-rangnade gong 75/-kosan on·enga. Uni gimin Polio tikarangko su·anio Anganwadi worker-rangnaba apsan daken gong 100/- ka·e on·na nanga,” ine AGHAWHA-ni secretary dabiangaha.

COVID-19-ni kamrangko ka·ani bidingo janapatskaengon, ia kenbegnigipa sabisiko warachakanio Anganwadi worker-rangba, an·tangtangna aro an·tangtangni nokdangrangna chanchipilgija an·tangtangko on·kange kamko ka·aha indiba Anganwadi worker-rangna bilsisani man·gnikode on·e da·onan bilsisanikode on·chipkujaenga ine AGHWHA-ni secretary suk ong·gijaniko parakataha.

Anganwadi worker-rangna on·gipa smartphone-rangchi kamrangko ka·sokjaengani gimin gital aro nambata smartphone-rangko on·skachina gitaba AGHAWHA dabiangaha.

‘Nutrigold’ ingipa cha·aniko manderang jegaltokengani gimin ia cha·anini pal nambata cha·anirangko sualatchina gitaba AGHWHA dabiangaha.

Indake ong·engon, Anganwadi worker-rangni kamrango an·tangtangko on·kange dakchakanirangko on·enggipa Mini Anganwadi worker-rangnaba honorarium-ko bariatchina AGHAWHA dabiangaha.

Get real time updates directly on your device, subscribe now.

Comments are closed.