SHILLONG: Meghalaya Energy Corporation Limited (MeECL)-ko chalaiani bewalrang namjaenga ine All India Trinamool Congress (AITC)-ni MLA Zenith Sangma suk ong·gijaniko parakatenba, MeECL-ko chalaianio gro agrehaode privatise ka·na nangao sokgnok ine mikrakataniko on·angaha.
“MeECL-ni bidingo anga changni chang sorkariko mikrakatahachim indiba kamrangko namdapatani dongjani a·sel da·o grorang nangana batengaha. MeECL-ni gro nangana batahaode privatise ka·na nangaona sokgnok aro angni niksamsoani gitade ia da·on ong·na siengaha,” ine Sangma parakataha.
Budget session-ni somoiode MeECL-ni japrako koros ong·ani gong kror 135 ong·e man·dapanide gong kror 71-san ong·aia aro ia jani gisepo ong·atanggipa Autumn Session-ode MeECL-ni japrako koros ong·ani gong kror 150 ong·enga aro man·dapanide gong kror 75-san ong·aia ine Power Minister-ni agangipa kattarangko gisik ra·atpilangengon, japrako gong kror 75 aro bilsio gong kror 900 komienggipa tangka paisarangko sawa gamgen ine AITC MLA sing·doangaha.
Loan-rangko changni chang ra·an baksana manderangni gong kror 617 tangkarangko MeECL gita bon·ataha ine sorkariko matnangatengon, ia sorkari MeECL-ko ja·kora ong·ataha aro da·o ia an·tangaride chadengna man·jaengaha ine Sangma parakataha.
“Ia sorkari a·dokni manderangna chanchigipa ong·ja indiba an·tangtangnasan chanchiaigipa ong·a. Uamang ong·gija kamrangchi manderangni tangka paisako salope katna jotton ka·enga,” ine Sangma parakataha.
Maini gimin bijoliko unit-prako dam rakdugae, gong 12/- ka·e breengaha aro iara sani namgnina ong·enga ine sing·doatengon, MSERC-ni approval gri MDA sorkari, ong·gija miksonganio iako dakengani gimin sorkari, manderangna aganchakaniko on·na nanga ine AITC MLA dabiangaha.
“Chief Minister ong·enggipa Conrad Sangma-ni ning·o MDA sorkari, tangka paisarangko bang·en jakkalsretenga aro MDA-o bakrimpaenggipa BJP, UDP aro gipin dolrangba iano jak donga,” ineba Sangma parakataha.